Şəhid Cəmil Nəcəfova həsr olunan “Şərəfli zabit ömür” kitabının təqdimatı keçirilib - FOTO
Şəhid baş leytenant Cəmil Nəcəfova həsr olunan “Şərəfli zabit ömür ” kitabının təqdimatı keçirilib.
1news.az xəbər verir ki, təqdimat dövlət himni və Şəhidlərimizin xatirəsinə bir dəqiqəlik sükutla başlayıb.
Daha sonra Cəmil Nəcəfovun həyatını əks etdirən videolent təqdim olunub.
Tədbirdə çıxış edən şəhid Cəmil Nəcəfovun anası Mətanət Nəcəfova, millət vəkili Kamaləddin Qafarov , şəhidin döyüş yoldaşları onunla bağlı xatirələrini bölüşüblər.
Kitabda Cəmil Nəcəfovun həyat yolu, hərbi xidməti, Vətən müharibəsində keçdiyi şərəfli döyüş yolu ailəsinin, dostlarının xatirələri əks olunub. Tədbir ədəbi bəddi kompozisiya ilə yekunlaşıb.
Qeyd edək ki, Cəmil Nəcəfov 2016-cı ildə Aprel döyüşlərində ön cəbhədə olub. 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Füzulinin azadlığı uğrunda gedən döyüşlərdə vuruşub. 10 oktyabr 2020-ci ildə Cəbrayılda döyüş tapşırığını yerinə yetirən zaman şəhid olub.
Cəmil Nəcəfov "Qarabağ" ordeni , "Vətən uğrunda" və "Cəbrayılın azad olunması uğrunda" medalları ilə təltif edilib.
