Nazir: “Ölkədə ümumi məşğulluğun 46 faizi kənd təsərrüfatı sahəsindədir”
“Ölkədə ümumi məşğulluğun 46 faizi kənd təsərrüfatı sahəsindədir və bu sahədə dayanıqlı transformasiya və keçid məsələləri böyük əhəmiyyət daşıyır”.
1news.az xəbər verir ki, bu sözləri ekologiya və təbii sərvətlər naziri, COP29-un Prezidenti Muxtar Babayev COP29 çərçivəsində keçirilən “Fermerlər üçün Bakı Harmoniya İqlim Təşəbbüsünün başladılması: fermerləri iqlim dayanıqlılığı üçün gücləndirmək” adlı tədbirin açılışında deyib.
Nazir vurğulayıb ki, əsas məqsəd kənd təsərrüfatının transformasiyasını yüksək səviyyədə dayanıqlı formada həyata keçirmək və bu prosesdə əməkdaşlığı artırmaqdır: “Bu təşəbbüslə birlikdə əməkdaşlıq genişlənəcək, kənd təsərrüfatına investisiya axını artacaq və özəl banklar da bu sahəyə cəlb olunacaq. Hədəflərimizdən biri də fermerlərin, xüsusilə qadın fermerlərin gücləndirilməsidir”.
M.Babayevin sözlərinə görə, kənd təsərrüfatı sahəsində fermerlər tərəfindən xeyli miqdarda emissiya və tullantı yaranır.
“Hər birimiz ərzaq təhlükəsizliyini təmin etmək üçün məsuliyyət daşıyırıq. Qadın fermerlərin iqlim dayanıqlılığının gücləndirilməsində xüsusi rolu var. Fermer qruplarını bu təşəbbüsə qoşulmağa çağırıram,” - deyə o bildirib.
