Meksika səfiri Zaqatalaya səfər edib

Əməkdaşlıq əlaqələrini intensivləşdirmək məqsədilə 19-20 avqust tarixlərində Meksikanın Azərbaycandakı səfiri Rodriqo Labardini Zaqatala rayonuna səfər edib.

1news.az-a səfirlikdən verilən məlumata görə, diplomatik missiyanın rəhbəri Zaqatala Rayon İcra Hakimiyyətinin başçısı Mübariz Əhmədzadə ilə görüşüb.

Görüşdə ikitərəfli münasibətlərin dərinləşməsi və əməkdaşlığın perspektivləri haqqında danışılıb. İlk növbədə, rayon rəhbəri Zaqatala haqqında, rayonun iqtisadiyyatı və infrastrukturu, eyni zamanda mədəniyyəti və tarixi barədə məlumat verib. Həmçinin, son illərdə rayonda görülmüş abadlıq və yenidənqurma işlərindən söz açıb. Bundan əlavə, Zaqatala əhalisinin əsas məşğuliyyət sahələrini də vurğulayb.

Səfir Labardini öz növbəsində, ikitərəfli mübasibətlərdəki dinamikadan, ələlxüsus, son dörd ildə iqtisadi, ticari, turistik və mədəni əlaqələrin möhkəmləsindən danışıb. Qeyd edib ki, rəsmi şəxlər, ticari missiyalar və müxtəlif sektorların nümayəndələrinin son illərdə həyata keçirdiyi qarşılıqlı səfərlər əlaqələrin inkişafına müsbət təsir göstərib, əməkdaşlığı intensivləşdirib.

Səfir vurğulayıb ki, regionlararası əməkdaşlıq hər iki ölkə arasındakı münasibətlərdə əhəmiyyətli yer tutur. Bu xüsusda, Zaqatala rayonu ilə Puebla ştatının Atliksko şəhəri arasında qardaşlaşmanın mümkünlüyünü qeyd edib.

Zaqatala rayonuna səfəri çərçivəsində səfir Labardini Heydər Əliyev Mərkəzini, Tarix və Etnoqrafiya Muzeyini ziyarət edib, eyni zamanda rayonun iqtisadi potensialı ilə tanış olmaq məqsədilə bir sıra vacib sənaye obyektlərinə baş çəkib.

P.Sultanova