“AGBank” “DəmirBank”la konsolidasiyayla bağlı bəyanat yayıb
Məlum olduğu kimi, “AGBank” ASC və “DəmirBank” ASC arasında konsolidasiya ilə bağlı ilkin protokol imzalanıb.
1news.az-ın məlumatına görə, “AGBank” bununla bağlı bəyanat yayıb. Hər iki bankın zəngin tarixə malik olmaqla Azərbaycanın ilk özəl banklarından olduğu qeyd olunan bəyanatda bildirilir ki, “DəmirBank” 1989-cu ildən, “AGBank” isə 1992-ci ildən fəaliyyət göstərir:
“Hər iki bankın təsisçiləri arasında nüfuzlu beynəlxalq maliyyə institutları yer alır. Bunların sırasına Avropa Yenidənqurma və İnkişaf Bankı (EBRD), Hollandiya İnkişaf Maliyyə Şirkəti (FMO), Beynəlxalq Maliyyə Korporasiyası (IFC) və s. təşkilatlar daxildir”.
Bəyanatda qeyd olunur ki, banklar resurslarını birləşdirməklə daha güclü, dayanıqlı olmaqla yanaşı, sinerji nəticəsində mövcud bazar paylarını artıracaqlar:
“Həm kadr potensialı, həm geniş xidmət şəbəkəsi, həm də təcrübə baxımından hər iki bank bazarda aparıcı banklardandır. Banklar resurslarını birləşdirməklə daha güclü, dayanıqlı olmaqla yanaşı, sinerji nəticəsində mövcud bazar paylarını artıracaqlar. Bununla yeni formalaşacaq maliyyə institutu mövqeyinə görə, beynəlxalq standartlara, trendlərə uyğunluğuna görə bazarın ən güclü oyunçularından biri kimi möhkəmlənəcək”.
Adıçəkilən bankdan konsolidasiyadan sonra yeni inkişaf mərhələsinə qədəm qoyulacağının gözlənildiyi də bildirilib.
“Belə ki, daha böyük xidmət şəbəkəsi ilə yeni məhsul və xidmətlər müştərilərə daha rahat, operativ şəkildə təqdim olunacaq. Eyni zamanda, yeni texnologoyaların, innovasiyaların daha geniş miqyasda tətbiqi nəzərdə tutulur ki, bu da biznes proseslərin müasirləşdirilməsi, daha keyfiyyətli müştəri xidmətinin həyata keçirilməsinə öz təsirini göstərəcək”- deyə, bəyanatda qeyd olunub.
1news.az
