ATƏT-in Minsk qrupu Dağlıq Qarabağ münaqişəsi ilə bağlı bəyanat yayıb

ATƏT-in Minsk qrupu geniş tərkibdə Dağlıq Qarabağ münaqişəsi ilə bağlı bəyanat yayıb.

1news.az-ın məlumatına görə, bəyanatda deyilir:

“Biz, ATƏT-in Minsk qrupu ölkələri, o cümlədən ATƏT-ə 2017-ci ildə sədrlik edəcək Avstriya və 2015-ci ildə sədrlik etmiş Serbiya təmas xəttində görünməmiş zorakılığın artmasını qətiyyətlə pisləyirik.

Biz toqquşmalardan əziyyət çəkmiş ailələrə başsağlığı verir və tərəfləri gücdən istifadəni dərhal dayandırmağa çağırırıq. Münaqişənin hərbi yolla həlli yoxdur”.

Bəyanatda bildirilir ki, vəziyyətin pisləşməsi ATƏT-in Minsk qrupu həmsədrlərinin himayəsi altında hərtərəfli sülh sazişi üzrə təcili danışıqlara ehtiyacın olduğunu göstərir:

“Minsk qrupuna üzv ölkələrin nümayəndələri Rusiya, ABŞ və Fransa həmsədrlərinin vasitəçilik səylərinə dəstəklərini ifadə edir, tərəflərlə mümkün qədər tez bir zamanda birbaşa məsləhətləşmələrin aparılması ilə bağlı planlarını alqışlayırlar”.

Xatırladaq ki, bu gün Vyanada ATƏT-in Minsk qrupu ölkələrinin geniş formatda görüşü baş tutub.

Onu da bildirək ki, Minsk qrupununu geniş tərkibinə Rusiya, ABŞ, Fransa, Belorus, Finlandiya, Almaniya, İtaliya, İsveç və Türkiyə daxildir.

1news.az