Petro Poroşenko Ermənistan-Azərbaycan qoşunlarının təmas xəttində son hadisələrlə bağlı narahatlığını ifadə edib

Ukrayna Prezidenti Petro Poroşenko aprelin 5-də Azərbaycan Respublikasının Prezidenti İlham Əliyevə telefonla zəng edib.

1news.az-ın dövlət başçısının rəsmi saytına istinadən verdiyi xəbərə görə, prezident Petro Poroşenko Ermənistan-Azərbaycan qoşunlarının təmas xəttində son hadisələrlə bağlı narahatlığını ifadə edib.

Dövlət başçıları Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsipləri əsasında sülh yolu ilə beynəlxalq təşkilatlar çərçivəsində həllinin vacibliyini vurğulayıblar.

Ukrayna Prezidenti bu münaqişənin Azərbaycanın suverenliyi, ərazi bütövlüyü və beynəlxalq səviyyədə tanınmış sərhədləri çərçivəsində həlli ilə bağlı ölkəsinin mövqeyinin dəyişməz olduğunu bildirib.

Söhbət zamanı Azərbaycan və Ukrayna prezidentləri ikitərəfli münasibətlərin perspektivləri ətrafında fikir mübadiləsi aparıblar.

1news.az