“Frankfurter Allgemeine Zeitung” qəzeti Ermənistan prezidentini Almaniyada sensasiyalı məqalə ilə “salamlayıb”
Almaniyanın aparıcı “Frankfurter Allgemeine Zeitung”qəzetində Ermənistan prezidenti Serj Sarkisyan barədə “Müharibə ilə sınanmış” adlı məqalə dərc olunub.
Sarkisyanın Almaniyaya səfəri ilə bağlı yazılmış məqalədə bildirilir ki, Berlində müzakirə ediləcək əsas mövzulardan biri Ermənistan-Azərbaycan, Dağlıq Qarabağ münaqişəsi olacaq.
Müəllif yazır: “Sarkisyan Berlində yenə də cəbhə xəttində yaranmış eskalasiyaya görə təkcə Azərbaycanın məsuliyyət daşıması haqda olan mövqeyini ortaya qoyacaq. Halbuki beynəlxalq birlik hər zaman Dağlıq Qarabağın və Azərbaycanın digər bölgələrinin davamlı işğalını tənqid edir”.
Məqalədə bildirilir ki, Sarkisyan müharibə illərində Dağlıq Qarabağda hərbi qüvvələrin yaradılması prosesində iştirak edib. O, özü də döyüşlərin iştirakçısı olub. Ermənistan prezidenti 1993-cü ilədək “erməni özünümüdafiə qüvvələri komitəsi”nə rəhbərlik edib, sonralar Ermənistan hökumətində müdafiə, daxili işlər və milli təhlükəsizlik naziri vəzifələrini tutub.
Diqqətə çatdırılır ki, Ermənistanın bir çox problemləri var. Regionda təcrid vəziyyətinə düşmüş, üç milyonluq əhalisi olan bu ölkədə insanların üçdə biri yoxsulluq şəraitində yaşayır. Siyasi elita rüşvətxordur, gənclər isə ölkəni tərk edirlər. İqtisadi böhran Ermənistana da öz təsirini göstərir. Bu ölkəyə xarici pul köçürmələrinin miqdarı əhəmiyyətli dərəcədə azalıb. 2015-ci ilin yayında elektrik enerjisinin qiymətinin artmasına qarşı keçirilmiş etirazların qarşısı zorakılıqla alınıb”.
Vurğulanır ki, Sarkisyan onun şəxsi maraqlarına uyğun olaraq Ermənistanda prezident respublikasından parlament respublikasına keçid naminə keçən ilin dekabr ayında referendum yolu ilə konstitusiya islahatları həyata keçirib. Seçki müşahidəçilərinin məlumatına görə referendum zamanı görünməmiş sayda qanun pozuntuları olub.
AZƏRTAC
