Mübariz Əhmədoğlu: “Ermənistan ordusunda vahid komandanlıq yoxdur”
Vaxtı ilə Qarabağda döyüşmüş döyüşçülər Ermənistan Müdafiə Nazirliyinin əmrinə tabe olmurlar.
1news.az-ın məlumatına görə, bunu Siyasi İnnovasiya və Texnologiyalar Mərkəzinin direktoru, politoloq Mübariz Əhmədoğlu Dağlıq Qarabağ münaqişəsi ilə bağlı Ermənistanda baş verən son dövrləri şərh edərkən deyib. O fikrini atəşkəsin razılaşdırılmasına baxmayaraq Ermənistandan “könüllülülərin” Dağlıq Qarabağa getməkdə davam etmələri ilə izah edib.
“Ermənistan Müdafiə Nazirliyinin mətbuat xidmətinin rəhbəri bildirdi ki, atəşkəsin razılaşdırılmasına baxmayaraq Ermənistandan “könüllülülər” Dağlıq Qarabağa getməkdə davam edirlər. Hazırda “Yerkrap”ın başçısı, general-mayor Manvel Qriqoryan keçmiş döyüşçülərdən ibarət böyük dəstə ilə Dağlıq Qarabağdadır. ASALA da özünün Dağlıq Qarabağda olduğunu artıq bildirib və bütün dünya ermənilərinə Dağlıq Qarabağa gəlməkdən ötrü müraciət edib.
Ermənistan müdafiə nazirliyinin mətbuat xidmətinin dediyindən ən azı aydın görünür ki, artıq “Yerkrap” və vaxtı ilə Dağlıq Qarabağda döyüşmüş digər döyüşçülər Müdafiə Nazirliyinin əmrinə tabe olmurlar. Müdafiə naziri müavinini Moskvaya göndərir, atəşkəs müqaviləsi imzalatdırır, bu tərəfdən də keçmiş döyüşçüləri Qarabağa göndərir. Yəni, bu belə paradoksal vəziyyət elə Ohanyanın özü üçün də problem yaradacaq”.
“Yerkrap”ın başçısı Manvel Qriqoryanın Dağlıq Qarabağın “azad olunmasında” özünü R.Köçəryan və S.Sərkisyandan daha haqlı saydığını deyən M.Əhmədoğlu hesab edir ki, hərbi əməliyyatlar ermənilər üçün uğurlu istiqamətə çevrilməzsə M.Qriqoryan hakimiyyət çevrilişinə cəhd göstərə bilər.
“M.Qriqoryan 2008-ci ilin 1 mart hadisələri zamanı müxalifətə keçmiş generaldır. Onun siyasi müxalifətçilik, həbsxana təcrübəsi var. Həbsxanadan qayıtdıqdan sonra yenidən prezident S.Sərkisyanı özü ilə hesablaşmağa məcbur etdi; “Yerkrap”ı özünə qaytardı. İki dəfə deputat seçilib. Hərbi əməliyyatlar ermənilər üçün uğurlu istiqamətə çevrilməzsə M.Qriqoryan Dağlıq Qarabağda indiki de-fakto hakimiyyəti dəyişməyə cəhd edəcək. Sonra “Qarabağdakı məğlubiyyətlərin günahı Yerevandadır” şüarı ilə Dağlıq Qarabağdan hərbiçilərin böyük bir qismini götürüb Yerevana hakimiyyəti dəyişməyə gedəcək.
Bunu M.Qriqoryan etməyəcəksə başqa erməni edəcək. Dağlıq Qarabağ müharibəsinin keçmiş iştirakçıları S.Sərkisyan hakimiyyətindən xeyli narazıdırlar. Onlar ağır sosial vəziyyətlərini siyasi müstəviyə keçiriblər.
Həm Dağlıq Qarabağ müharibəsi regionunda, həm də Ermənistanın daxilində yaxın vaxtlarda yeni vəziyyət yarana bilər”.
1news.az
