Bakı Beynəlxalq Multikulturalizm Mərkəzinin Drezden Filialı Almaniya hökumətinə etiraz müraciət ünvanlayıb - FOTO

Bakı Beynəlxalq Multikulturalizm Mərkəzinin Drezden filialı Almaniya hökumətinə etiraz müraciəti ünvanlayıb.

1news.az-ın məlumatına görə, Azərbaycan torpaqlarını zəbt edən işğalçı ölkənin prezidenti Serj Sarkisyanın Almaniyaya səfərinə qarşı keçirilən etiraz aksiyasında öz üzvləri ilə yaxından iştirak edən qurumun müraciətində erməni silahlı birləşmələri tərəfindən mülki əhalinin atəşə tutulmasından dünya ictimaiyyətinin narahatlıq keçirdiyi ifadə olunur.

Eyni zamanda vurğulanır ki, BMT-nin Təhlükəsizlik Şurasının bu münqişənin həll olunması və bununla erməni silahlı qüvvələrinin qeyd-şərtsiz Azərbaycana məxsus olan torpaqlardan çıxarılmasına dair qətnamələri bu günədək icra olunmamış qalır.

Müraciətdə erməni silahlı birləşmələrinin hücumu nəticəsində Azərbaycanın 20 faiz torpağının işal olunması və 1 milyona yaxın azərbaycanlının məcburi köçkün vəziyyətinə düşməsi, münaqişə nəticəsində yaranan insan tələfatı, maddi-mədəniyyət abidələrinin, elm-təhsil müəssisələrinin, dini ibadət yerlərinin, saysız-hesabsız yaşayış evlərinin dağıdılması əsas gətirilərək Almaniya hökumətindən münaqişənin sülh yolu ilə həlli üçün işğalçı rejimə diplomatik təzyiqlər göstərməsi tələb edilir.

Bu konfliktin həllində Azərbaycan hökumətinin sülh tərəfdarı olduğu müraciətdə qeyd edilir. Mərkəzin Drezden Filialı tərəqqipərvər dünya ictimaiyyətini münaqişənin sülh yolu ilə həll olunmasına köməklik göstərməyə və insan tələfatının qarşısını almaq üçün səylərini artırmağa dəvət edir.

Müraciət Bakı Beynəlxalq Multikulturalizm Mərkəzinin Drezden filialının icraçı direktoru professor Birgit Vaysgerber tərəfindən imzalanıb.

1news.az