Brüsseldə Ermənistan-Azərbaycan münaqişəsi ilə bağlı müzakirələr keçirilib

Brüssel şəhərində Avropanın nüfuzlu “beyin mərkəz”lərindən olan Avropa Siyasət Mərkəzində “Dağlıq Qarabağ münaqişəsi. Növbəti nədir?” mövzusunda müzakirələr keçirilib.

1news.az-ın AZƏRTAC-a istinadla verdiyi xəbərə görə, müzakirələrlə əlaqədar aprelin 19-da Avropa İttifaqı məsələlərini işıqlandıran EurActiv xəbər portalında məqalələr yayılıb.

Məqalələrdə müzakirələrdə iştirak etmiş Avropa Parlamentinin deputatı Riçard Hovit, Avropa Siyasət Mərkəzinin Məşvərət Şurasının üzvü Denis Sammut, Stokholm Beynəlxalq Sülh Tədqiqatları İnstitutu nəzdində fəaliyyət göstərən Qafqazda münaqişə, zorakılıq və sülh quruculuğu layihəsinin rəhbəri Nil Melvin və Minsk qrupunun Fransadan olan keçmiş həmsədri Jak Forun səsləndirdiyi fikirlər yer alıb.

Riçard Hovit bildirir ki, Avropa İttifaqı Minsk prosesinin bir hissəsinə çevrilməlidir, əks təqdirdə, Dağlıq Qarabağ regionunda irimiqyaslı müharibənin başlanması riski ilə qarşılaşmalı olacaq. O, həmçinin qeyd edir ki, böyük inkişaf potensialına malik olan Cənubi Qafqaz Avropa üçün mühüm bir regiondur və elə bu səbəbdən də Aİ-nin danışıqlara cəlb edilməsi zəruridir.

Həmçinin məqalədə Avropa Siyasət Mərkəzinin Məsləhət Şurasının üzvü D.Sammutun müzakirələr zamanı qeyd etdiyi fikirlərə yer verilir: “Aİ yalnız Dağlıq Qarabağda deyil, ümumilikdə Cənubi Qafqaz regionunda öz rolunu artırmalıdır. Aİ münaqişənin həlli prosesinə birbaşa cəlb olunmaq məsələsindən kənarda qalmaqda davam edə bilməz”.

Məqalədə Nil Melvinə istinadən qeyd olunur: “Tərəflər arasında baş vermiş son qarşıdurmalara Aİ tərəfindən verilən reaksiyanın zəif olması məni təəccübləndirdi. Bu, çox ciddi hərbi qarşıdurmadır və gördüklərimiz son onilliklərdə baş vermiş ən ciddi pozuntular idi”.

1news.az