BSU-da Ermənistan-Azərbaycan münaqişəsi üzrə intizam tədris ediləcək
Ermənistan-Azərbaycan Dağlıq Qarabağ münaqişəsi üzrə intizam növbəti ildən Bakı Slavyan Universitetinin (BSU) Beynəlxalq münasibətlər və ölkəşünaslıq kafedrasında tədris ediləcək.
Bu haqda 1news.az-a BSU-nun Beynəlxalq münasibətlər və ölkəşünaslıq kafedrasının müdiri, fəlsəfə elmləri doktoru, professor Məmməd Əliyev bildirib.
Onun sözlərinə görə, bununla bağlı qərar rəhbərlik etdiyi kafedranın iclası zamanı “Bakinskiy raboçiy” qəzetində Azərbaycan Respublikası Prezidenti Administrasiyasının rəhbəri, Azərbaycan Milli Elmlər Akademiyasının həqiqi üzvü, akademik Ramiz Mehdiyevin “Ermənistan-Azərbaycan, Dağlıq Qarabağ münaqişəsi Ermənistanın vətəndaş cəmiyyəti kontekstində” məqaləsinin müzakirəsi zamanı qəbul edilib.
İclasda həmçinin Tarixi elmlərin doktoru Habil Məmmədov, Siyasi elmləri üzrə fəlsəfə doktoru Ləman Qarayeva, Siyasi elmləri üzrə fəlsəfə doktoru, dosent Zümrüd Məlikova, Tarixi elmləri üzrə doktor, dosent Şəhla Nuruzadə və başqaları da çıxış edib.
M.Əliyev Ermənistan-Azərbaycan münaqişəsinin yaranma tarixindən, qarşıdurmanın ilk illərində Azərbaycanın informasiya blokadasında olduğundan bəhs edib:
“Əlbəttə ki, dünya ictimaiyyətinə Qarabağ həqiqətlərinin beynəlxalq tribunalardan və xarici KİV vasitəsilə çatdırılmasında ümummilli lider Heydər Əliyevin rolu qiymətsizdir”.
Onun sözlərinə görə, Ramiz Mehdiyevin məqaləsinin əsas leytmotivinin bu gün Ermənistan əhalisinin Azərbaycanın iqtisadi və demokratik nailiyyətlərini görməsindən ibarətdir:
“Ermənistan hüquq müdafiəçisi və ictimai xadimin Bakıya dəvət edilərək Xocalı soyqırımı qurbanlarına qoyulmuş heykələ gül dəstəsi düzməsinin özü əhəmiyyəli faktordur. Bu, nəinki dünya ictimaiyyəti, eləcə də erməni vətəndaşlarının da münaqişənin sülh yolu ilə həllini dərk etməsini göstərir”.
M.Əliyev Prezident Administrasiyası rəhbərinin məqaləsinin ilkin olaraq rus dilində yazıldığını vurğulayıb:
“Müsbət haldır ki, məqalə nəinki Azərbaycanda, MDB-də və dünyada oxunacaq. Bu məqaləni oxuyarkən dünya ictimaiyyəti Azərbaycanın sülhsevər mövqeyilə bağlı düzgün nəticələr çıxaracaq”.
Məqalədən sitat gətirərək professor qeyd edib ki, münaqişənin uzanma şərtləri zamanı istənilən gərgin vəziyyət, qüvvələr arasında balansın pozulması ən faciəvi nəticələrə gətirib çıxara bilər:
“BMT-ın Təhlükəsizlik Şurasının məlum qətnamələri, çoxsaylı beynəlxalq strukturların qərarlarına baxmayaraq, yenə də xalq diplomatiyasına ehtiyac var. Yəni xalq özü də barışığa doğru addım atmalıdır. Sevindirici haldır ki, nəhayət erməni ictimaiyyəti sülhün vacibliyini aydın dərk edib”.
M. Əliyev məqalədə Azərbaycan ərazisində müxtəlif xalqların əmin-amanlıqda yaşaması faktının əks olunmasını da qeyd edib:
“Məqalədə Azərbaycanda çoxsaylı xalqlar və milli azlıqların yaşaması da qeyd edilir. Bu da xalqımızın multukulturalizm dəyərlərinə sadiqliyinin göstəricisidir. Təsadüfi deyil ki, cənab Prezident 2016-cı ilin Azərbaycanda “Multikulturalizm ili” adlandırıb. Biz, akademik Ramiz Mehdiyevə bu məqalənin vaxtında çıxışı, elmi ictimaiyyətə vaxtında çatdırılması üçün minnətdarlığımızı bildiririk. Gələcəkdə bu mövzuda mühazirə oxuyarkən bu məqalədən sitat gətirərəyik”.
1news.az
