Giorgi Kvirikaşvili: Gürcüstanda yanğının söndürülməsi üçün ilk vacib yardımı Azərbaycan etdi
Gürcüstanın Baş naziri Giorgi Kvirikaşvili ölkə ərazisində davam edən meşə yanğınlarının söndürülməsinə qonşu dövlətlərin, xüsusilə Azərbaycanın göstərdiyi yardımı yüksək qiymətləndirib.
1news.az-ın AZƏRTAC-a istinadla verdiyi xəbərə görə, bununla bağlı xüsusi bəyanatla çıxış edən Baş nazir Gürcüstana ilk vacib köməyin Azərbaycandan gəldiyini bildirib. O vurğulayıb ki, Azərbaycandan gələn helikopter yanğının söndürülməsində iştirak edir.
Türkiyədən gələn iki helikopter artıq Batumidədir, tezliklə onlar da yanğının söndürülməsi əməliyyatına başlayacaq.
Xatırladaq ki, Gürcüstanda meşə yanğınları avqustun 20-də başlayıb. Külək yanğının tam söndürülməsini çətinləşdirir.
Azərbaycan Respublikasının Prezidenti İlham Əliyevin tapşırığına əsasən, Fövqəladə Hallar Nazirliyi (FHN) Gürcüstanın Borjomi-Xaraqulsk qoruğunda baş vermiş meşə yanğınlarının söndürülməsinə kömək məqsədilə helikopter göndərib.
Mövzu ilə əlaqədar oxuyun:
Gürcü hökuməti İlham Əliyevə təşəkkür edib
FHN meşə yanğınlarını söndürmək üçün Gürcüstana helikopter göndərib
S.Xankişiyeva
