AzQAC-ın baş katibi: Rusiya QXC-nin ərzaq dolu maşını Xankəndiyə çatıb, yüklər boşaldılır
"Bu gün saat 7 radələrində Rusiya sülhməramlılarının blok postundan, Rusiya Qızıl Xaç Cəmiyyətinin ərzaq dolu humanitar yükü keçdi. Artıq ərzaq dolu yük avtomobili Xankəndiyə çatıb. Hazırda yük müvafiq anbara boşaldılır".
Bunu 1news.az APA-ya istinadla xəbər verir ki, Azərbaycan Qızıl Aypara Cəmiyyətinin (AzQAC) baş katibi Ceyhun Mirzəyev deyib.
"Rusiya Qızıl Xaç Cəmiyyətinin əməkdaşları döndükdən sonra onlarla ətraflı söhbət etmək imkanımız olacaq və bu barədə ətraflı məlumat veriləcək. Bizim yüklərimiz hələlik buradadıd. Hər hansı bir yenilik olsa, məlumat verəcəyik. Növbəti humanitar yardımlara gəlincə, əvvəllər də qeyd etmişdik ki, biz yerli şəraiti bilmirik, erməni əsilli sakinlərin nələrə, ərzağa, yaxud nələrə ehtiyaclarının olduğu haqda məlumatımız yoxdur. Yəni bu barədə müvafiq qiymətləndirmədən sonra planlama aparılır və biz cəmiyyət olaraq işimizi həmin planlanmaya uyğun qura bilirik. Yəni birinci ehtiyaclar müəyyənləşdirilməlidir. Ehtiyaclar müəyyənləşəndən sonra istiqamətlərə uyğun addım atılır".
