“Azərbaycan münasibətlərin tənzimlənməsində qeyri-hərbi münasibətlərə üstünlük vermişdi” - Politoloq
"Azərbaycan 44 günlük Vətən Müharibəsindən sonra iki ölkə arasındakı münasibətlərin tənzimlənməsində qeyri-hərbi münasibətlərə üstünlük vermişdi".
Bu sözləri 1news.az-a açıqlamasında politoloq Yeganə Hacıyeva deyib. Onun sözlərinə görə, son 10 ayda Ermənistan tərəfindən Azərbaycana qarşı beynəlxalq arenada ermənilərin havadarları vasitəsilə bir kampaniya başlatmışdılar:
"Bildiyimiz kimi son 10 ayda Ermənistan tərəfindən Azərbaycana qarşı beynəlxalq arenada ermənilərin havadarları vasitəsilə bir kampaniya başlamışdı. Bu kampaniyanın sonunda da Qarabağdakı erməni separatçı qüvvələri, həmçinin Ermənistan dövləti mövcud vəziyyətdən öz çıxarını götürürdü. Əslində bu kampaniyanın birbaşa sifarişçiləri özləri idi. Həmin ərəfələrdə ermənilər Qarabağda qanunsuz seçki keçirirdilər. Aydın məsələdir ki, Azərbaycan 44 günlük Vətən Müharibəsindən sonra iki ölkə arasındakı münasibətlərin tənzimlənməsində qeyri-hərbi münasibətlərə üstünlük vermişdi. Azərbaycan diplomatik üsullarla, humanitar layihələrlə münasibətləri qaydasına qoymağa çalışırdı. Xatırlatmaq istəyirəm ki, Azərbaycan və Ermənistan mediası arasında Tiflisdə görüş təşkil olunmuşdu. Həmin görüşdə Azərbaycan və Ermənistan tərəflərindən başqa Gürcüstandan və Türkiyədən də media nümayəndələri iştirak edirdi. Qeyri-hərbi, diplomatik üsullardan əlavə olaraq, biz media, sivil cəmiyyət vasitəsilə də sülh üçün addımlar atırdıq. Bu son hadisələrdən sonra heç bir sutka da çəkməyən lokal antiterror əməliyyatlarına ehtiyac duyuldu. Cəmi 23 saata bütün daşlar yerinə qoyuldu".
Y.Hacıyeva qeyd edir ki, son hadisələr bir daha onu göstərdi ki, Ermənistan və onun havadarları Azərbaycana qarşı kampaniyalara son qoymalıdırlar:
"Azərbaycanın keçirdiyi lokal xarakterli antiterror tədbirləri nəticəsində Qarabağ bölgəsində yerləşən Ermənistan silahlı qüvvələrinin birləşmələri ağ bayraq qaldırdılar. Razılaşmaya, əsasən, Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoyur, döyüş mövqelərindən və hərbi postlardan çıxır və tam şəkildə tərk-silah olunurlar.
Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır. Paralel şəkildə bütün silah-sursat və ağır texnika təhvil verilir. Bildiyimiz kimi, bu gün səhər saatlarında Azərbaycan Respublikası Prezidentinin Administrasiyasının dəvəti ilə Yevlax şəhərində Azərbaycanın Qarabağ bölgəsinin erməni sakinlərinin nümayəndələri ilə görüş keçirildi. Görüşdə Azərbaycan Respublikasının Konstitusiyası və qanunları əsasında reinteqrasiya məsələləri müzakirə edildi. Son hadisələr bir daha onu göstərdi ki, Ermənistan və onun havadarları Azərbaycana qarşı kampaniyalara son qoymalıdırlar".
Xatırladaq ki, üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə 19-20 sentyabr tarixlərində bölgədə lokal xarakterli antiterror tədbirləri həyata keçirilib.
Tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də, döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılır. Mülki əhali və infrastruktur obyektləri hədəfə alınmır, yalnız legitim hərbi hədəflər sıradan çıxarılıb.
Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq 2023-cü il sentyabrın 20-də saat 13:00-da aşağıdakı şərtlər altında lokal xarakterli antiterror tədbirlərinin dayandırılması barədə razılıq əldə olunub.
