Məhkəmə-Hüquq Şurası Koreya Respublikasında keçirilən beynəlxalq tədbirdə təmsil olunub
2024-cü ilin 9-19 iyun tarixlərində Koreya Respublikasının Korrupsiyaya qarşı mübarizə və Vətəndaş Hüquqları Komissiyası (ACRC) tərəfindən Azərbaycan, Özbəkistan və Tacikistan respublikalarının aidiyyəti qurumlarının əməkdaşları üçün korrupsiyaya qarşı mübarizə sahəsində təlim təşkil edilib.
1news.az xəbər verir ki, Koreya Respublikasının paytaxtı Seul şəhərində keçirilən tədbirdə ölkəmizi Məhkəmə-Hüquq Şurasının Aparatına ezam olunmuş Bakı Apellyasiya Məhkəməsinin hakimi Səməd Cəfərov, Məhkəmə-Hüquq Şurasının Aparatının və Azərbaycan Respublikası Baş Prokurorluğunun əməkdaşlarından ibarət nümayəndə heyəti təmsil edib.
Korrupsiyaya qarşı mübarizə siyasətinin həyata keçirilməsi, müvafiq sahədə maraqlar toqquşması hallarının qarşısının alınması, məlumat verən şəxslərin müdafiəsinin təmin edilməsi, bu qəbildən olan cinayət işlərinin istintaqının xarakterik xüsusiyyətləri, cinayət yolu ilə əldə edilmiş əmlakın leqallaşdırılmasına qarşı effektiv mübarizə, aktivlərin bərpası və idarə olunması, korrupsiyaya qarşı mübarizə sahəsində hüquqi yardım və ekstradisiya mövzularında qarşılıqlı müzakirələr keçirilib.
Tədbir çərçivəsində nümayəndə heyətini qəbul edən Komissiyanın sədri cənab Yu Çul Van seminarın qarşılıqlı münasibətlərin inkişafında vacib rol oynadığını qeyd edərək, korrupsiyaya qarşı mübarizədə əməkdaşlığın genişlənməsi və birgə səylər göstərilməsinin əhəmiyyətini vurğulayıb.
Heyət tərəfindən ölkəmizdə korrupsiyaya qarşı mübarizə sahəsində görülmüş işlər, bu sahədə mövcud müsbət təcrübə və əldə olunmuş nailiyyətlər barədə tədbir iştirakçılarına ətraflı məlumat verilib.
Sonda təlimi uğurlu şəkildə başa vurmuş Azərbaycan Respublikasının nümayəndə heyətinin üzvləri müvafiq sertifikatlarla təltif olunublar.
