Tanınmış müğənni qəzadan son anda xilas oldu, ağır xəsarət alan var - VİDEO
Müğənni Mətin Hüseynzadə (MadTeen) qəzadan son anda xilas olub.
1news.az xəbər verir ki, ifaçı avtoyuma məntəqəsinin qarşısında olarkən anidən idarəetməni itirən avtomobil ərazidəki ağ rəngli maşına çırpılıb.
Musiqiçi qəzadan son anda xilas olsa da, avtomobilin arxasında dayanan avtoyuma məntəqəsinin əməkdaşı gənc oğlan bədbəxt hadisədən qaça bilməyib.
Mətin Hüseynzadə 1news.az-a açıqlamasında baş verənlərlə bağlı bunları deyib: “Dünən oldu - evdən çıxdım və iki ay əvvəl aldığım maşını yuduzdurmağa qərar verdim. Hər şey avtoyuma tamamlandığı anda baş verdi. Yan tərəfə üç addım atmasaydım, hər şey kədərli bitə bilərdi. Maşınıma çırpılan maşının sürücüsü özünü pis hiss etdiyini, gözlərinin qaraldığını deyir”.
Müğənni qeyd edir ki, qəza nəticəsində avtoyuma məntəqəsinin əməkdaşı xəsarət alıb, ayaqları sınıb, kəllə-beyin travması ilə xəstəxanadadır: “Oğlanın halına pis oluram, tezliklə sağalmasını arzulayıram. Maşın önəmli deyil, əsas can sağlığıdır. Hadisəsən şok keçirdim”.
Hadisəni törədən şəxsin taksi sürücüsü olduğu görünür.
