“Zamanla eyni dalğada” – ASCO-nun zəngin tarixini əks etdirən kitab-fotoalbom nəşr olunub
“Azərbaycan Xəzər Dəniz Gəmiçiliyi” QSC-nin (ASCO) tarixi irsini yeni bir baxış bucağından təqdim edən “Zamanla eyni dalğada” adlı kitab-fotoalbom işıq üzü görüb.
1news.az xəbər verir ki, nəşrdə 166 illik tarixi olan şirkətin fəaliyyətinin bütün mərhələləri əksini tapıb. Kitab-fotoalbom vasitəsilə təkcə ASCO-nun tarixi ilə deyil, həm də onun ölkəmizdə dənizçilik ənənələrinin formalaşdırılmasındakı rolu ilə yaxından tanış olmaq mümkündür.
Böyük sevgiylə hazırlanmış bu nəşri Cənubi Qafqazın fəaliyyətdə olan ən qədim şirkətinin inkişaf yolunu canlandıran vizual əsər də hesab etmək olar: “Zamanla eyni dalğada” kitab-fotoalbomunda yer alan hər bir arxiv sənədi, eləcə də nadir fotoşəkillər və müasir görüntülər özlüyündə ASCO-nun tarixini şərh edir.
Kitab-fotoalbom dənizçilərin, gəmilərin, ümumilikdə ASCO-nun Azərbaycan iqtisadiyyatına verdiyi töhfənin əhəmiyyətini vurğulamaqla, təkcə məlumat mənbəyi deyil, həm də gəmiçiliyə və dənizçi peşəsinə marağı olan hər kəs üçün ilham qaynağı rolunu oynayır.
Azərbaycan və ingilis dilində nəşr olunan kitab-fotoalbomun elektron versiyası ilə www.asco.az saytının “Media” bölməsinin “E-nəşrlər” alt bölməsində tanış bilərsiniz.
