Dmitri Peskov “LifeNews” əməkdaşlarının Azərbaycandan çıxarılması məsələsinə münasibət bildirib
Rusiya prezidentinin mətbuat katibi Dmitri Peskov “LifeNews” telekanalı əməkdaşlarının Azərbaycandan çıxarılması məsələsinə münasibət bildirib.
1news.az-ın TASS-a istinadla verdiyi xəbərə görə, Peskov bildirib ki, sözsüz, redaksiya siyasəti hər hansı bir hərəkətin səbəbi ola bilməz və olmamalıdır. Həmçinin o, jurnalistlərin qanunvericiliyin normalarına riayət etmələrinin vacibliyini vurğulayıb.
Qeyd edək ki, bir müddət əvvəl Rusiyanın “LifeNews” telekanalının jurnalistləri Azərbaycandan çıxarılıb. Onlar akkreditasiyadan keçmədən ölkəyə gəlib və Azərbaycan XİN-in iddiasına görə, dünya ictimaiyyətinə Dağlıq Qarabağdakı vəziyyətlə bağlı yalan məlumat çatdırıb.
Xatırladaq ki, Rusiyanın “Life News” telekanalı Tərtərdən reportaj hazırlayarkən təxribata yol veriblər, həqiqətə uyğun olmayan material təqdim ediblər.
Müxbir bəyan edib ki, sakinlər təlaş içindədir və kütləvi surətsdə öz evlərini tərk edirlər.
Tərtərin girişində 15 maşın saxlanan avtodayanacaqda dayanan müxbir bildirir ki, rayondan sakinlər bütün ailə ilə buraya gəlir, öz maşınlarında yatır və evlərinə qayıtmağa qorxurlar. Guya ki, çoxları başqa şəhərlərə gedirlər.
Lakin kadrlardan göründüyü kimi, demək olar ki, maşınların çoxu boşdur.
Xatırladaq ki, aprelin 1-dən 2-nə keçən gecə erməni silahlı qüvvələri Azərbaycanın yaşayış məntəqələrini güclü artilleriyalardan atəşə məruz qoyub.
Azərbaycan Ordusunun qısa müddətdə həyata keçirilən sürətli əks-həmlə zamanı erməni birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən tam azad olunub.
1news.az
