“Azəryolservis” 2184 işsiz vətəndaşı işlə təmin edə bilər
Yol tikintisi sahəsi üzrə təcrübəsi olan 2184 işsiz vətəndaşın müvafiq işlə təmin olunması nəzərdə tutulub.
1news.az-ın məlumatına görə, “Azəryolservis” ASC-nin mətbuat xidmətindən bildirilib ki, Azərbaycan Respublikasının Prezidenti İlham Əliyevin müvafiq fərmanları ilə təsdiqlənən və ölkəmizdə 2004-cü ildən uğurla reallaşdırılan regionların sosial-iqtisadi inkişafına dair Dövlət proqramları çərçivəsində həyata keçirilən müxtəlif layihələr Azərbaycanın simasını dəyişib və respublikamızı infrastruktur təminatı baxımından dünyanın ən qabaqcıl ölkələri sırasına çıxarıb.
Son illər dövlət proqramları çərçivəsində “Azəryolservis” ASC tərəfindən respublikanın bütün bölgələrində yol infrastrukturunun yenilənməsi istiqamətində irimiqyaslı layihələr həyata keçirilib, dünya standartlarına cavab verən yeni yollar çəkilib, yol ötürücüləri, körpülər, yeraltı və yerüstü piyada keçidləri tikilib.
Bu çərçivədə kənd yollarının yenidənqurulması da xüsusi əhəmiyyət kəsb edir. Son iki il ərzində Prezident İlham Əliyev tərəfindən kəndlərarası avtomobil yollarının tikintisinə aid 32 şəhər və rayon üzrə 41 sərəncam imzalanıb. Ölkə başçısı kənd yollarının tikintisinin eyni zamanda bölgələrdə işsizliyin aradan qaldırılması üçün də vacib amillərdən biri olduğunu deyib.
“Azəryolservis” ASC Prezident İlham Əliyevin kənd və qəsəbə yollarının tikintisinin aparılması istiqamətində tövsiyə və göstərişlərinə əsasən, “Azərbaycan Respublikası regionlarının 2014-2018-ci illərdə sosial-iqtisadi inkişafı” və “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqram”larında avtomobil yollarının tikintisini vaxtında icra etmək, o cümlədən işsizliyin aradan qaldırılması istiqamətində ölkə rəhbərliyinin həyata keçirdiyi layihələrə dəstək olmaq məqsədilə Bakı şəhərində və regionlarda cəmiyyətin Yol İstismar İdarələrinə işçi qəbulu aparılır.
Yol tikintisi sahəsi üzrə, yola aid xüsusi texnikanın, maşın-mexanizmlərin idarə edilməsində təcrübəsi olan və yaşayış yeri üzrə Məşğulluq mərkəzlərində işsiz kimi qeydiyyatda olan vətəndaşlar ASC-nin həmin rayon və şəhərlərdə yerləşən Yol İstismar İdarələrinə müraciət edə bilərlər. Ümumilikdə yol tikintisi sahəsi üzrə təcrübəsi olan 2184 işsiz vətəndaşın müvafiq işlə təmin olunması nəzərdə tutulub.
Qeyd edək ki, ölkə başçısının yerli istehsalın daha da gücləndirilməsi istiqamətində verdiyi tövsiyə və tapşırıqlarına əsasən “Azəryolservis” ASC yolların tikintisi, yenidənqurulması və təmiri zamanı yerli tikinti materiallarından istifadə edir. Elə "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunan konfransda çıxış edən Prezident İlham Əliyev kənd yollarının tikintisində bizim xarici komponentə heç bir ehtiyacımız olmadığını vurğulayıb.
1news.az
