Parlamentdə bələdiyyələrlə bağlı müzakirə keçirilib

Bələdiyyələrin birləşdirilməsindən sonra onların sayı 1607-yə çatıb.

Bu haqda Milli Məclisin plenar iclası zamanı ədliyyə nazirinin müavini Vilayət Zahirov bildirib.

Onun sözlərinə görə, qanunsuz torpaq satışı və ələ keçirilməsi hallarının aradan  qaldırılması ilə bağlı tədbirlər həyata keçirilib.

“Ədliyyə Nazirliyi Bələdiyyə İş üzrə Mərkəzə ötən il ərzində 2093 müraciət daxil olub”,- o, qeyd edib.

V.Zahirov bələdiyyə satınalmaları haqqında qanunun qəbul olunmasını vacib hesab edib.

“Bu bələdiyyələrin fəaliyyətində şəffaflığı artıracaq”, -o deyib.

Regional məsələlər üzrə parlament komitəsinin rrəhbəri Arif Rəhimzadə çıxışı zamanı qeyd edib ki, bələdiyyə orqanlarına ayrılan maliyyə vəsaitləri artırılmalıdır.

“Elə bələdiyyələr var ki, hətta işçilərinə əməkhaqqı ödəyə bilmirlər. Dövlət bələdiyyələrə vəsait ayırmalıdır. İndiyə qədər bələdiyyənin torpaq xəritəsi də yaradılmayıb”,- deyən A.Rəhimzadə, bələdiyyənin vergi toplanmasındakı iştirakının məhdud olduğu vurğulayıb.

Komitə sədri onu da qeyd edib ki, Milli Məclisdə səsləndirilən tənqid və təkliflərə heç bir reaksiya verilmir. “ Plenar iclasda səsləndirilən tənqidi rəylərin müvafiq orqanlara göndərilməsini təklif edirəm”, -o, bildirib.

İclasda çıxış edən Oktay Əsədov da, bələdiyyələrə yardım etməyin vacibliyindən danışdı. “Lakin bələdiyyələrin özü də çalışmalı, təkliflər irəli sürməlidir”,- spiker qeyd edib.

1news.az