Bakıda Qarşılıqlı Fəaliyyət Şurasının illik plenar iclası keçiriləcək

8-9 mart tarixlərində Bakıda Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə  Qarşılıqlı Fəaliyyət Şurasının illik plenar iclası keçiriləcək.

1news.az-ın məlumatına görə, 30-dan artıq sabiq dövlət və hökumət başçılarını bir araya gətirən Şuranın iclasında Yunanıstan, Norveç, Ukrayna, İrlandiya, Macarıstan və Kolumbiyanın sabiq prezidentləri iştirak edəcək. Həmçinin, İordaniya, Macarıstan, Tanzaniya, Nigeriya, Kipr və Yamaykanın da sabiq prezidentləri və baş nazirləri iclasa qatılacaq.

İclasda Kanadanın sabiq baş naziri Jan Çretyen, Avstriyanın sabiq Kansleri Frank Vranitzki, Latviyanın  sabiq Prezidenti Vaira Viki-Frayberqa, İsgəndəriyyə Kitabxanasının Direktoru İsmayıl Səragəldin məruzə ilə çıxış edəcək.

Qeyd edək ki, Qarşılıqlı Fəaliyyət Şurası 1983-cü ildə müstəqil beynəlxalq təşkilat kimi fəaliyyətə başlayıb. Təşkilat ayrı-ayrı ölkələrin dövlət xadimləri arasında enerji və beynəlxalq sahədə təcrübə mübadiləsinə şərait yaradır.

Şura üzvləri bəşəriyyətin qarşılaşdığı siyasi, iqtisadi və sosial problemlərin həlli məqsədilə tövsiyələr irəli sürür. 30-dan artıq sabiq dövlət və hökumət başçılarından ibarət olan Şura əsasən, beynəlxalq əməkdaşlıq sahəsində sülh və təhlükəsizlik, iqtisadi dirçəliş, universal etik standartlar kimi  istiqamətlər üzrə fəaliyyət göstərir.

1news.az