Azərbaycan səfiri etimadnaməsini Küveyt Dövlətinin Əmirinə təqdim edib - FOTO
Azərbaycanın Küveyt Dövlətində yeni təyin olunmuş səfiri etimadnaməsini Küveyt Dövlətinin Əmiri Şeyx Sabah Əl-Əhməd Əl-Sabaha təqdim edib.
Səfirlikdən 1news.az-a verilən məlumata görə, rəsmi mərasimdən sonra keçirilən görüşdə səfir Elxan Qəhrəman Azərbaycan Prezidenti İlham Əliyevin iki dost ölkə arasında əlaqələrin inkişafına böyük əhəmiyyət verdiyini qeyd edib. O, Əmir Şeyx Sabah Əl-Əhmədin Azərbaycana səfər edəcəyinə ümidvar olduğunu qeyd edərək, bu səfərin iki ölkə arasında mövcud səmimi münasibətlərin daha da genişlənməsinə öz töhfəsini verəcəyinə inandığını vurğulayıb.
Səfir Azərbaycan Prezidenti İlham Əliyevin şəxsən Əmir Şeyx Sabah Əl-Əhmədə və dost Küveyt xalqına ünvanladığı salamları və xoş arzularını çatdırıb. Diplomat Küveytdə səfir təyin olunmağı ilə əlaqədar qürur hissi keçirdiyini, bu şərəfli vəzifənin üzərinə qoyduğu məsuliyyəti qeyd edərək, Azərbaycan-Küveyt münasibətlərinin daha da möhkəmləndirilməsi və genişləndirilməsi üçün var qüvvəsini sərf edəcəyini vurğulayıb.
Əlahəzrət Əmir Azərbaycanla əlaqələrin inkişafını alqışladığını və bu əlaqələrin daha da inkişaf edəcəyinə əmin olduğunu bildirib. Əmir xoş arzularına görə Prezident İlham Əliyevə səmimi minnətdarlığını ifadə edib və öz növbəsində Azərbaycan Prezidentinə salamlarını və Azərbaycan xalqına rifah, inkişaf və tərəqqi arzularını çatdırıb.
Əmir Şeyx Sabah Əl-Əhməd 2009-cu ildə Azərbaycan Respublikasının Prezidenti İlham Əliyevin Küveyt Dövlətinə rəsmi səfərinin ona bəxş etdiyi xoş təəssüratlarından danışaraq, özünün Azərbaycana səfər etməsi arzusunun yaxın gələcəkdə reallaşacağına ümidvar olduğunu bildirib.
