Ukraynada bütün azərbaycanlıları Prezident İlham Əliyevin ətrafında daha sıx birləşməyə çağırdılar
Azərbaycanın Dağlıq Qarabağ ərazisi ətrafında son hadisələr və ermənilərin təxribatına baxmayaraq Kiyevin “Ukrayna” mehmanxanasının konfrans zalında Ukraynada yaşayan diasporumuzun nümayəndələrinin iclası olub.
1news.az-ın AZƏRTAC-a istinadla verdiyi xəbərə görə, iclasda “Ukrayna Azərbaycanlıları Birləşmiş Diasporu” Ümumukrayna İctimai Təşkilatının sədri Hikmət Cavadov, Ukrayna Azərbaycanlıları Birləşmiş Konqresinin sədri, Ukrayna Millətlər Assambleyasının rəhbəri Rövşən Tağıyev, Kiyev Milli Aviasiya Universitetinin professoru, Ukraynanın Əməkdar Təhsil İşçisi, Ukrayna azərbaycanlıları ictimai təşkilatının rəhbəri Arif Quliyev, Şeyx Şakir Yəhyayev, diaspor fəalları Akif Gülməmmədov, Fail Abidov, Hacı Əbülfəz Qasımov, Hamlet Paşayev, Ağasəlim Bağırov və başqaları iştirak ediblər.
Həmvətənlərimiz Azərbaycan Prezidenti, Silahlı Qüvvələrin Ali Baş Komandanı İlham Əliyevin siyasətini yekdilliklə dəstəkləyiblər, Azərbaycan Silahlı Qüvvələrinin döyüş qabiliyyətinə, azərbaycanlı əsgər və zabitlərin qəhrəmanlığına və şücaətinə yüksək qiymət veriblər.
Ukraynada yaşayan həmvətənlərimiz azərbaycanlıları çətin sınaq günlərində Prezident, Silahlı Qüvvələrin Ali Baş Komandanı İlham Əliyevin ətrafında daha sıx birləşməyə, yüksək vətənpərvərlik göstərməyə və Azərbaycana hərtərəfli dəstək göstərməyə çağırıblar.
Sonra tədbirə toplaşanlar düşmənlə döyüşdə şəhid olmuş hərbi qulluqçuların yaxınlarına və ailələrinə başsağlığı verib, həlak olanların nurlu xatirəsini bir dəqiqəlik sükutla yad ediblər.
Bütün çıxış edənlər vurğulayıblar ki, erməni təcavüzkarları və işğalçıları Azərbaycana növbəti dəfə hücum edəcəyi təqdirdə də bu günlərdə Dağlıq Qarabağda olduğu kimi lazımi cavabı alacaq və ciddi itkilər verərək geri oturdulacaqlar.
Tədbirdə, həmçinin Ukrayna ictimaiyyətinin, yerli KİV-lərin Ermənistan-Azərbaycan, Dağlıq Qarabağ münaqişəsi haqqında obyektiv məlumatlandırılmasının zəruriliyi, erməni saxtakarlarının “materiallarına” mediada cavab verilməsi barədə fikirlər səsləndirilib.
1news.az
