Müdafiə Nazirliyi "LifeNew”-un təxribat xarakterli tele-süjetinə dair açıqlama verib
“Uğursuzluğa düçar olan və məğlubiyyətlə qarşılaşan Ermənistanın hərbi və siyasi rəhbərliyi anti-Azərbaycan niyyətli xarici KİV-in də fəaliyyətindən bəhrələnərək ölkəmiz haqqında təxribat xarakterli, guya Suriyada İŞİD terrorçu təşkilatının tərkibində fəaliyyət göstərən azərbaycanlıların Qarabağda ermənilərə qarşı hərbi əməliyyatlarda iştirak etmək məqsədilə Türkiyə ərazisindən keçərək Azərbaycana gəlmələri barədə yaydıqları məlumatlar tamamilə əsassızdır və dezinformasiyadır”.
1news.az-ın Müdafiə Nazirliyinin mətbuat xidmətinə istinadla verdiyi xəbərə görə, Azərbaycan Respublikasının Silahlı Qüvvələrinin hərbi-texniki imkanları və potensialı ölkəmizin suverenliyinin, ərazi bütövlüyünün və toxunulmazlığının yüksək səviyyədə təmin edilməsi üçün tam yetərlidir.
“Bir daha bildiririk ki, istənilən terror təşkilatının fəaliyyəti onun üzvlərinin milli, dini və digər mənsubiyyətindən asılı olmayaraq, beynəlxalq sülh və təhlükəsizliyə, eləcədə milli təhlükəsizliyə ciddi təhdiddir. Hər hansı niyyətlə, Azərbaycan Respublikasının ərazisinə keçməyə cəhd edən terror təşkilatı üzvləri müəyyən edilərək məsuliyyətə cəlb ediləcəklər”, - deyə nazirliyin açıqlamasında qeyd edilib.
Mövzu ilə əlaqdar oxuyun:
XİN: Təxribatçı materialdan sonra “LifeNews”-un əməkdaşları Azərbaycandan çıxarılıb
Dmitri Peskov “LifeNews” əməkdaşlarının Azərbaycandan çıxarılması məsələsinə münasibət bildirib
1news.az
