Praqada keçirilən tədbirdə Ermənistan ordusunun təxribatçı əməllərindən danışılıb
Azərbaycanın Çexiyadakı səfiri Fərid Şəfiyev Praqadakı “Anglo-American” Universitetində “Qafqaz bölgəsində siyasi gərginlik” mövzusunda çıxış edib.
Tədbirdə bir sıra ölkələrin Çexiyadakı diplomatik nümayəndəliklərinin başçıları, KİV nümayəndələri, universitetlərin və “beyin mərkəzləri”nin təmsilçiləri, yerli ictimaiyyətin nümayəndələri iştirak ediblər.
Səfir Fərid Şəfiyev çıxışında son günlərdə Ermənistan-Azərbaycan qoşunlarının təmas xəttində baş verən hadisələr, erməni qoşunlarının Azərbaycan mövqelərinə qarşı həyata keçirdiyi təxribat xarakterli həmlələr və təmas xətti boyunca dinc yaşayış məntəqələrinin intensiv atəşə məruz qalması barədə danışıb. Səfir, həmçinin Ermənistan-Azərbaycan münaqişəsinin tarixi, ölkəmizin bu münaqişə ilə bağlı mövqeyi barədə məlumat verib.
Tədbirdə iştirak edən bəzi erməni tələbələr qoşunların təmas xəttində baş verən hadisələrlə bağlı və Azərbaycan hökuməti əleyhinə yönəlmiş təxribat xarakterli suallar ünvanlasalar da, F.Şəfiyev beynəlxalq təşkilatlar tərəfindən qəbul edilmiş sənədlərə və beynəlxalq hüquqa əsaslanan tutarlı cavablar verib.
Daha sonra Azərbaycan səfiri regionda baş verən hadisələr, həyata keçirilən iqtisadi və enerji layihələri, habelə Çexiya-Azərbaycan ikitərəfli münasibətləri haqqında məlumat təqdim edib.
AZƏRTAC
