Bakıda qəza törədərək yaşlı qadını öldürən avtobus sürücüsü tutulub

Bakı şəhər Baş Polis İdarəsi və şəhər prokurorluğu bu gün Nizami rayonunda baş verən yol-nəqliyyat hadisəsi ilə bağlı məlumat yayıblar.

1news.az-ın verdiyi xəbərə görə, məlumatda bildirilir ki, aprelin 8-də saat 10:39-da  Nizami rayonu ərazisində 103 saylı marşrut xəttinin sürücüsü 1988-ci il təvəllüdlü  Dünyamalı Rzayev idarə etdiyi “Otoyol” markalı 90 OG 171 dövlət nömrə nişanlı avtobusla həmin vaxt yolu keçən piyada 1954-cü il təvəllüdlü Svetlana Jitovanı vurub, daha sonra hərəkətdə olan  30 saylı marşrut xəttinin sürücüsü  1984-cü il təvəllüdlü Vasif Əliyevin idarə etdiyi “Daewoo” markalı 10 TG 373 dövlət nömrə nişanlı avtobusla toqquşub.

Sonuncu idarəetməni itirərək Araslan Xəlilovun idarə etdiyi “VAZ 2107” markalı 10 LG 127 dövlət nömrə nişanlı avtomaşınla toqquşub.

Hadisə nəticəsində piyada S.Jitova aldığı xəsarətlərdən hadisə yerində ölüb, avtobuslarda olan sərnişinlərdən 10-u müxtəlif bədən xəsarətləri alaraq 3 saylı Şəhər Kliniki xəstəxanasına yerləşdiriliblər.

Faktla bağlı Rayon Polis İdarəsinin İstintaq Şöbəsində Cinayət Məcəlləsinin 263.2  (yol hərəkəti və nəqliyyat vasitələrinin istismarı qaydalarını pozma)  və 264-cü ( yol nəqliyyat hadisəsi yerindən qaçma) maddələri ilə cinayət işi başlanıb.

Keçirilmiş təxirəsalınmaz istintaq və əməliyyat-axtarış tədbirləri nəticəsində cinayətin Dünyamalı Rzayev tərəfindən törədilməsində əsaslı şübhələr yarandığından o, tutularaq istintaqa cəlb olunub.

Hazırda cinayət işi üzrə istintaq tədbirləri davam etdirilir.

1news.az

Mövzu ilə əlaqədar oxuyun:

Bakıda iki sərnişin avtobusu toqquşub: ölən və xəsarət alanlar var - FOTO