Azərbaycan-Avar İB: “Ermənistanı təcavüzkar siyasətdən imtina etməyə və işğal etdiyi torpaqlardan çıxmağa çağırırıq”
“Artıq 25 ildən çoxdur ki, bütün dünya ictimaiyyətinin gözü qarşısında beynəlxalq hüququn əsas prinsipləri işğalçı Ermənistanın təcavüzkar siyasəti nəticəsində nümayişkaranə surətdə tapdanaraq Azərbaycan Respublikasının ərazi bütövlüyü və sərhədlərinin toxunulmazlığı, habelə 1 milyondan artıq qaçqın və məcburi köçkün vəziyyətinə salınmış əhalinin fundamental hüquq və azadlıqları kobudcasına pozulmaqdadır”.
1news.az-ın verdiyi xəbərə görə, bu sözlər Azərbaycan-Avar İctimai Birliyinin (İB) yaydığı bəyanatda qeyd olunur.
Bəyanatı diqqətinizə çatdırırıq:
“BMT Təhlükəsizlik Şurasının işğal edilmiş Azərbaycan torpaqlarından erməni silahlı birləşmələrinin qeyd-şərtsiz çıxarılması haqqında dörd qətnaməsi hələ də icra olunmamış qalır.
Son günlər qoşunların təmas xəttində atəşkəs rejiminin işğalçı erməni silahlı qüvvələri tərəfindən pozulması Ermənistanın cinayətkar rəhbərliyinin apardığı siyasətin regionda sülh və əmin-amanlıq işinə böyük təhdid olduğunu bir daha dünyaya sübut etdi.
Azərbaycan Respublikasının Prezidenti, Ali Baş Komandan cənab İlham Əliyevin qətiyyətli addımları və Milli Ordumuzun sarsıdıcı əks zərbələri ilə layiqli cavabını alan düşmən acı məğlubiyyətdən dərs çıxarmaq əvəzinə, öz vandal xislətinə sadiq qalaraq, yaşayış məskənlərimizi və mülki əhalimizi iriçaplı ağır silahlardan atəşə tutdu, günahsız insanların ölümünə və yaralanmasına səbəb oldu. Biz ermənilərin bu azğınlığını qətiyyətlə pisləyir və həmişə olduğu kimi, Prezidentimizlə, Milli Ordumuzla bir yerdə olduğumuzu bəyan edirik.
Ötən əsrin 90-cı illərində Ermənistan silahlı qüvvələrinin təcavüzünə qarşı mübarizədə şəhidlər vermiş avar gəncliyi bu gün də ön cəbhədədir və Ali Baş Komandanın əmri ilə silaha sarılaraq Azərbaycan Respublikasının ərazi bütövlüyünün müdafiəsində ayıq-sayıq dayanmışdır.
Bu gün Azərbaycanda müxtəlif etnik qruplar, millətlər, azsaylı xalqlar mehriban ailə şəraitində yaşayır. Biz, bu birliyi və vəhdəti dövlətçiliyimizin tarixi nailiyyəti və uğurlarımızın başlıca amili kimi qiymətləndirir və qoruyuruq. Ermənistan-Azərbaycan, Dağlıq Qarabağ münaqişəsində Azərbaycan Respublikasının haqq işini dəstəkləyir, işğalçı Ermənistanı təcavüzkar siyasətdən imtina etməyə, silahlı qüvvələrini işğal etdiyi torpaqlardan çıxarmağa, Dağlıq Qarabağın erməni icmasını isə separatizm meyillərindən əl çəkməyə, beynəlxalq hüquq normalarına hörmət etməyə, vətəndaşı olduqları Azərbaycan Respublikasında hökm sürən sabitlik, dinamik sosial-iqtisadi inkişaf, tolerantlıq və rifah mühitinin töhfələrindən bəhrələnməyə çağırırıq”.
1news.az
