Gəncə yazarlarının Qarabağ çağırışı
Bütün bəşəriyyətə məlumdur ki, Dağlıq Qarabağ əzəli və əbədi Azərbaycan torpağıdır.
Məlum tarixin üstündən xətt çəkmək istəyən mənfur qonşularımızın ərazi iddiası, heç bir ölçüyə sığmayan son hərəkətləri Azərbaycan xalqı ilə birlikdə bəşəriyyətin sülhpərvər düşüncəli insanlarını da bir araya gətirib. Azərbaycan Silahlı Qüvvələrinin torpaqlarımızı azad etmək uğurundakı şücaəti bütün xalqımızı, onun oğul və qızlarını, həmçinin ziyalıları ayağa qaldırıb.
1news.az xəbər verir ki, bu fikirlər qoşunların təmas xəttində baş verən son hadisələrə həsr olunmuş yığıncaqda Azərbaycan Yazarlar Birliyinin (AYB) Gəncə bölməsinin sədri Xəzangül tərəfindən səsləndirilib.
Tədbirdə Azərbaycanın ərazi bütövlüyü uğrunda həlak olan şəhidlərimizin ruhu bir dəqiqəlik sükutla yad edilib.
Sonra Xəzangül bildirib ki, son günlər Qarabağ mövzusu bütün şair, yazıçı və sənətkarların yaradıcılığının əsas ana xəttini təşkil edir. Bu günkü yığıncaq da yazarlarımızın tam yaradıcılıq ruhu ilə hər bir Azərbaycan əsgərinin yanında olub, onlarla birgə mübarizə aparmaq istəyindən irəli gəlib. Gələcəkdə yazarlarımızın yaradıcılıq arzusunun ifadəsi kimi onların yaratdığı əsərlər Azərbaycan əsgərlərinin qüvvət və qüdrətinin tərənnümü kimi qəbul ediləcəkdir.
Şair Bayram Göyçəli qeyd edib ki, son günlər qoşunların təmas xəttində baş verənlər bir daha dövlətlə xalqın birliyini, vəhdətini sübut etdi.
Sonra AYB Gəncə bölməsinin üzvləri Qarabağa həsr etdikləri ən son əsərlərini oxuyub və yeni yazılan ədəbi nümunələr ətrafında ədəbi müzakirələr aparılıb.
