Milli Qəhrəmanlara həsr edilmiş sənədli filmlərinin təqdimatı olub - FOTO

Tərtər rayon Mədəniyyət Evində Azərbaycanın Milli Qəhrəmanları Elman Hüseynova və Əlyar Əliyevə həsr olunmuş “İlk Komandir” və “Pəhləvan Komandir” sənədli filmlərinin təqdimatı olub. Hər iki film Mədəniyyət və Turizm Nazirliyinin sifarişi ilə “Yaddaş” studiyasında lentə alınıb.

1news.az-ın AZƏRTAC-a istinadla verdiyi xəbərə görə, təqdimat mərasimində rayonun rəhbər işçiləri və ictimaiyyət nümayəndələri, Qarabağ müharibəsi veteranları, Milli Qəhrəmanların ailə üzvləri iştirak ediblər. Tədbirdə çıxış edən rejissor Nizami Abbas ekran əsərlərinin ərsəyə gəlməsində gördüyü işlərdən danışıb, çəkilişdə əməyi olan bütün insanlara minnətdarlığını bildirib.

Sonra Milli Qəhrəman Elman Hüseynovun döyüş yoldaşı Pənah Məmmədov və oğlu Emin Hüseynli öz xatirlərini iştirakçılarla bölüşüblər.

Tərtər Rayon İcra Hakimiyyətinin başçısı Müstəqim Məmmədov çıxışında tərtərlilərin respublikamızın ərazi bütövlüyü uğrunda fədakar mübarizəsindən, ölkəmizdə müharibə iştirakçılarına, şəhid ailələrinə göstərilən dövlət qayğısından, şəhidlərin adının əbədiləşdirilməsindən danışıb. Bildirilib ki, Azərbaycanın Milli Qəhrəmanları Elman Hüseynovun və Mübariz İbrahimovun, “Azərbaycan Bayrağı” ordenli Mehrac Mahmudovun, şəhid İlqar Həsənovun adlarını daşıyan küçələrdə abadlıq-yenidənqurma işləri aparılır. Tərtər rayonundan olan digər Milli Qəhrəman Vəzir Orucovun adını daşıyan küçənin girişində onun barelyefi qoyulub.

M.Məmmədov sənədli filmlərin gənc nəslin vətənpərvərlik ruhunda tərbiyə olunmasında əhəmiyyətini yüksək qiymətləndirərək, yaradıcı kollektivə minnətdarlığını bildirib.

Tədbir iştirakçıları sonra Milli Qəhrəmanlara həsr edilmiş filmlərə tamaşa ediblər.

1news.az