Ağ Evin rəsmi saytında Qarabağda ədalətin bərpasına çağırışla bağlı petisiya lazımi imza toplayıb - FOTO

Ağ Evin rəsmi saytında Qarabağda ədalətin bərpasına çağırışla bağlı petisiya 100 min imza toplayıb ki, bu da rəsmi cavabın verilməsi üçün vacibdir.

6 aprel tarixində “Ədaləti təmin etmək və böyük fəlakətin qarşısını almaq” adı altında yerləşdirilən petisiyanın səhəri günü Azərbaycan və Ermənistan 4 gün davam edən hərbi əməliyyatlardan sonra təmas xəttində atəşi dayandırdı.

Sənəd Obama Administrasiyasını AŞPA-nın 2085№ qətnaməsini dəstəkləməyə, Ermənistanın işğal etdiyi Azərbaycan torpaqlarından çıxarılmasına kömək etməyə və regionda humanitar fəlakətin qarşısını almağa çağırır.

Mətndə bildirilir ki, AŞPA-nın 2085№-li qətnaməsində Dağlıq Qarabağın və digər Azərbaycan ərazilərinin Ermənistan tərəfindən işğal olunması faktı qeyd olunub. Qətnamədə dərhal erməni silahlı qüvvələrinin işğal olunmuş ərazilərdən çıxarılması tələb olunur.

Çağırışa dünyanın müxtəlif ölkələrindən olan məşhur insanların da qoşulması bir neçə gün ərzində 100min səsin toplanmasına səbəb olub ki, bu daAğ Evin ona cavab verməsini təmin edir.

Azərbaycanın işğal olunmuş ərazilərinin azad olunması ilə bağlı petisiyanı tanınmış türk futbolçu, “Barselona” klubunun oyunçusu Arda Turan da dəstəkləyib. “Qardaş Azərbaycan xalqının başladığı kampaniyaya mən də imza atdım”,- qeydini futbolçu Twitter hesabında yazıb.

“Fənərbaxça” futbol klubu da qardaş Azərbaycanı dəstəkləməsi ilə bağlı rəsmi Facebook səhifəsində öz fanatlarına müraciət  edib.

Bundan əlavə, Türkiyə məşhurları da Ağ Evin saytında yerləşdirilən petisiyanı dəstəkləyib.

1news.az