Mərkəzi Bank uçot dərəcəsini artırıb – YENİLƏNİB
Azərbaycan Mərkəzi Bankının (AMB) Rəyasət Heyəti uçot dərəcəsinin artırılması ilə bağlı qərar qəbul edib.
“8 avqust 2016-cı il tarixindən likvidlik əməliyyatları üzrə faiz dəhlizinin aşağı və yuxarı hədlərini dəyişməz saxlamaqla uçot dərəcəsini 9,5% səviyyəsinə qaldırmaq barədə qərar qəbul edilib”, - Mərkəzi Bankın məlumatında qeyd edilir.
Məlumatda həmçinin qeyd edilir ki, milli valyutaya olan etimadı gücləndirmək, manat depozitlərinin artmasını təşviq etmək, pul bazarında formalaşmış konyunktura uyğun olaraq pul siyasəti alətlərinin təkmilləşdirilməsinə şərait yaratmaq üçün Mərkəzi Bank pul siyasəti alətlərinin parametrlərinə, o cümlədən faiz dəhlizinə zəruri korreksiyalar edib.
“Pul kütləsinin nəzərdə tutulan artım templərinə nail olmaq üçün Mərkəzi Bank likvidliyin sterilizasiyası əməliyyatlarını aktivləşdirmiş, iyun ayından başlayaraq milli valyutada sərbəst vəsaitlərin cəlb olunması üzrə depozit əməliyyatlarına başlayıb”, - AMB-nin məlumatında qeyd olunur.
Xatırladaq ki, uçot dərəcəsi – bu, Mərkəzi Bankın kommersiya banklarına kreditlər üzrə faiz dərəcəsidir. İqtisadi şəraiti tənzimləyərək Mərkəzi Bank uçot dərəcəsini həm artıra, həm də azalda bilər. Eləcə də buna uyğun olaraq pul kütləsini də həmçinin – həm artıra, həm də azalda bilər.
Uçot dərəcəsinin azalması ilə Mərkəzi Bankın kommersiya bankları tərəfindən pul tələbatı artır. Kommersiya bankları daha çox kredit götürür ki, bunun müqabilində onların maliyyə imkanları da artır. Əgər uçot dərəcəsi azalırsa, o zaman kommersiya bankları tərəfindən pul tələbatı da əksinə olaraq azalır.
Mərkəzi Bank tərəfindən uçot dərəcəsinin dəyişməsi – artması və ya azalması bazar iqtisadiyyatının nəzəriyyə və praktikasında “bahalı” və “ucuz” pul siyasəti adlanır.
“Bahalı” pul siyasəti (uçot dərəcəsi artırılanda) hökumət inflasiyanı azaltmaq istədiyi zaman həyata keçirir. “Ucuz” pul siyasəti (uçot dərəcəsi azalanda)hökumət hasilatın zəifləməsi, daha çox struktur dəyişikliyi zamanı müəssisənin dəstəklənməsi zamanı həyata keçirilir. Buna görə, “ucuz” pul siyasətini həmçinin “inflasiya kreditləşməsi siyasəti” də adlandırırlar.
Uçot dərəcəsinin artırılması inflasiya ilə mübarizədə ən güclü vasitə hesab olunur. Lakin eyni zamanda bu, istehsalatın ixtisarına da gətirib çıxara bilər.
1news.az
