Mübariz Əhmədoğlu: Sərkisyan Qarabağ məğlubiyyətinin məsuliyyətini bölüşmək üçün şəriklərini seçdi
Ermənistan parlament seçkilərinin ən böyük nəticəsi Ermənistanın prezidentli idarəçilik formasından parlament idarəçilik formasına keçməsi prosesinin başa çatması oldu. Ermənistan kimi dövlətlərdə prezident üsuli-idarəsi daha vacibdir.
1news.az-ın məlumatına görə, bunu Siyasi İnnovasiya və Texnologiyalar Mərkəzinin sədri, politoloq Mübariz Əhmədoğlu Ermənistanda keçirilmiş seçkilərlə bağlı xəbəri şərh edərkən bildirib:
“Parlament diskussiyaları müharibə olacağı təqdirdə baş nazirə ali baş komandan səlahiyyətinin verilməsini və ya yeni baş nazirin seçilməsini xeyli mürəkkəbləşdirə bilər. Prezidentli respublikada belə məsələlər əvvəlcədən bəlli olur. Ehtimali müharibədə S.Sərkisyanın əvvəlcədən məğlub yolunu seçməsi diqqəti çəkir.
İnvestisiya qıtlığı Ermənistanın ikinci ən böyük problemidir. Parlament debatları investisiya cəlbediciliyi prizmasından risk artıran parametrdir. Qafqaz kimi mürəkkəb regionda investoru maraqlandıran ən birinci məsələ sabitlikdir. Prezident üsuli-idarəsi parlament idarəçilik sisteminə nisbətən sabitliyi də asan təmin edir. Bütün bunlara baxmayaraq S.Sərkisyan parlament idarəçiliyini seçdi. Təsadüfi deyil. Çünki S.Sərkisyan Dağlıq Qarabağ məsələsini uduzduğunu dəqiq anlayıb. 2014-2015-ci illər Ermənistanın hərbi təxribatlarında yeni mərhələ yarandı. Ermənistanda KTMT və Rusiyanın müdafiəsinə inanırdılar.
Buna görə təxribatların böyük bir qismi Ermənistan-Azərbaycan dövlət sərhədində reallaşdırıldı. Hətta Rusiya vətəndaşı Vladiqafqaz (RF) qeydiyyatında olan Rusiya dövlət nömrə nişanlı iri həcmli yük avtomobili ilə dövlət sərhədində Azərbaycan hərbçilərinin gözü qarşısında təxribat hərəkətləri etdilər. Azərbaycan hərbçiləri bu yük avtomobilini zərərsizləşdirdilər. RF-dən heç bir reaksiya gəlmədi”.
Politoloq qeyd edib ki, 2014-cü ilin avqustunda dövlət sərhədində 8 erməni hərbçisinin ölümü ilə bağlı erməni təxribatı yaddan çıxmayıb:
“Ermənistan rəhbərliyinin digər inamı öz ordularının gücünə idi. İşğal olunmuş Azərbaycan ərazisində Ermənistana məxsus helikopterin vurulması Ermənistan rəhbərliyi üçün “soyuq duş” oldu. S.Sərkisyanın həm KTMT-yə, həm də öz ordusunun gücünə inamı sarsıldı. Məğlub olacağına inandı. Ona görə məğlubiyyətin məsuliyyətini bölüşmək üçün sistem yaratmağa başladı.
Ermənistanın hərbi təxribatlarına həm də ümumiləşdirilmiş cavab olan 2016-cı ilin aprel döyüşləri bir daha sübut etdi ki, S.Sərkisyanın ordusu və havadarları onun köməyinə çatmayacaq. Ona görə də fikrindən daşınmadı və prezidentli respublikanın parlamentli respublikasına çevrilməsi istiqamətində addımlarını daha da sürətləndirdi.
S.Sərkisyanın yaxından iştirakı ilə Ermənistanda 5 parlament, 3 referendum və 3 prezident seçkisi keçirilib. Bunlardan 9-da S.Sərkisyan birinci şəxs statusunda idi. Son parlament seçkilərinə nümayiş etdirdiyi yanaşma əvvəlkilərdən prinsipial fərqlənir: “Biz anlamalıyıq ki, aprelin 2-si oyun və ya sürətli danışanların müsabiqəsi deyil. Biz başa düşməliyik ki, aprelin 2-də biz binanın üstünə tullananları seçmirik. Biz xalqımızın mövcudluq hüququnun müdafiəçilərini seçirik. Biz atəş və hücum haqqında, o cümlədən zəruri halda geri çəkilmə haqqında əmr verənləri- bunu etməyə kifayət qədər daxili gücü olanları seçirik”.
M.Əhmədoğlu qeyd edib ki, Qarabağ klanının başçısı, Ermənistanın prezidenti, S.Sərkisyan Ermənistan ordusunun işğal olunmuş ərazilərdən geri çəkilməsini mümkün sayır:
“Bununla da S.Sərkisyan erməni xalqına vacib mesaj verdi. Erməni ordusunun geri çəkilmə mümkünlüyü aprel parlament seçkilərinin Ermənistanda bu vaxtadək keçirilmiş bütün seçkilərdən fərqləndirir. Erməni ordusunun geri çəkilməsinin məsuliyyətini təkcə S.Sərkisyan daşımayacaq”.
1news.az
