Mübariz Qurbanlı: "Qurban bayramı xeyirxahlığın ən parlaq nümunələrindəndir"

Dini Qurumlarla İş üzrə Dövlət Komitəsinin sədri Mübariz Qurbanlı müqəddəs Qurban bayramı münasibətilə Azərbaycan xalqını təbrik edib.
1news.az xəbər verir ki, M.Qurbanlı cəmiyyətə bərabərlik və mərhəmət kimi yüksək əxlaqi hisslər aşılayan Qurban bayramının xeyirxahlığın ən parlaq nümunələrindən olduğunu vurğulayıb:
“Şəfqət və humanizm duyğularını özündə ehtiva edən bu bayram müsəlman dünyasında böyük nüfuz sahibi olan ölkəmizdə ruh yüksəkliyi ilə qeyd olunur. Xalqımız öz adət-ənənələrinə, dininə, eləcə də milli-mənəvi dəyərlərinə hər zaman böyük ehtiram göstərib, hətta tarixin ən çətin dövrlərində də İslamın humanizm, qardaşlıq və mehribanlıq prinsiplərinə sadiqlik göstərərək Qurban bayramını qeyd edib.
Müstəqilliyimizin bərpasından sonra bu günün rəsmi bayram elan olunması xalqımızın öz milli-dini ənənələrinə sıx bağlılığının nümunəsidir. Respublikamızda 2017-ci ilin “İslam Həmrəyliyi İli” elan olunması da dövlətimizin və onun başçısı cənab İlham Əliyevin İslam dininə verdiyi ali dəyərin bariz göstəricilərindəndir.
Sizin hər birinizi Qurban bayramı münasibəti ilə təbrik edir, süfrələrinizə ruzi-bərəkət arzulayıram. Bayramınız mübarək!”.
P.Sultanova