IMAGINE festivalı filmlərin və tamaşaçıların sayı ilə rekord vurdu
Avropa İttifaqının (Aİ) Azərbaycan nümayəndəliyinin təşəbbüsü ilə 2-ci İMAGİNE Avropa Tolerantlıq Festivalı uğurla başa çatıb.
1news.az xəbər verir ki, 2-17 may tarixlərində baş tutan Festivalda tolerantlıq, multikulturalizm və mədəniyyətlərarası dialoq kimi mövzuları özündə əhatə edən tədbirlərdə 4000 nəfər iştirak edib.
Bu ilki festivalın proqramı Aİ-yə üzv 16 və qeyri-üzv 12 ölkənin 37 filminin nümayişi, 3 konsert, rejissor və musiqiçilərin iştirakı ilə 6 masterklass və 6 debatlardan ibarət idi. Venesiyanın Ca' Foscari Universitetindən gəlmiş xüsusi qonaq Azərbaycan Dillər Universiteti və ADA Universitetinin tələbələri ilə tolerantlıq mövzusuna aid məsələləri müzakirə etmək ilə proqrama akademik element qatıblar.
“Biz IMAGINE Avropa Tolerantlıq festivalını gələcək nəsil üçün adət və ənənə halına çevirmək istəyirik ki, hansı ki, bu ənənə Avropa İttifaqı və digər dövlətləri tolernatlıq və multikultiralizm ideyası altında birləşdirəcək. Festivallar uğurlu keçirildiyi üçün bu tədbirin gələn il də baş tutacağına ümid edirik”, Avropa İttifaqının Azərbaycandakı nümayəndəliyinin rəhbəri, səfir Kestutis Yankauskas bildirib.
Keçən il olduğu kimi bu il də Festival musiqi sevərlərin böyük məmnuniyyətinə səbəb oldu. İlk dəfə olaraq sehirli Perudan Andes musiqisi və ecazkar yunan Rembetiko musiqisi muğamla ahəngdarlıq təşkil edib.
Mayın 7-si isə IMAGINE festivalı çərçivəsində Opera Studiyada “Avropa Günü” adlı təntənəli konsert keçirilib. Konsertdə yerli musiqiçilərdən ibarət orkestr Avropa və Azərbaycan musiqilərindən parçalar ifa edib.
Bu ilki IMAGINE festivalın hüdudları genişləndi və Bakıda Park Cinema, Landmark Hotel, Yarat, ADA Universiteti, Azərbaycan Dövlət Mədəniyyət və İncəsənət Universiteti, Bakı Musiqi Akademiyası, Azərbaycan Dillər Universiteti və sairə məkanlarla məhdudlaşmayaraq ilk dəfə olaraq paytaxtan çıxıb Qubada “Sakit Qəlb” adlı İsrail filmini nümayiş etdirdi.
2-ci IMAGINE Avropa Tolerantlıq Festivalı İsveçrə, Norveç, Braziliya, Kosta Rika, Peru, Meksika, İsrail, Moldova, Argentina, ABŞ səfirliklərinin və “United Cultures” təşkilatının Aİ ilə əməkdaşlığı çərçivəsində baş tutub. Festivalın təşəbbüsü Landmark Baku, “Yarat” Müasir İncəsənət Mərkəzi, Park Cinema, Cinex Production, Azərbaycan Dövlət Mədəniyyət və İncəsənət Universiteti, ADA Universiteti, Bakı Musiqi Akademiyası, Ca’ Foscari University of Venice, Azərbaycan Dillər Universiteti tərəfindən dəstəklənib.
P.Sultanova
