Köməyə çağırış: Qazaxıstanda döyülərək iflic və gözləri kor olan Asimin acı taleyi – VİDEO

Hər bir ana üçün ən böyük dərd övlad dərdidir. Bundan da böyük dərd isə köməyə ehtiyacı olan övladına kömək edə bilməməkdir - elə Nazilə Sultanova kimi. O, artıq 9 ildir ki, oğlunun həyatı üçün mübarizə aparır.

Yaşlı qadının dediyinə görə, həyat yoldaşı rəhmətə gedəndən sonra iki oğlu ilə birlikdə yaşamağa başlayıb. Lakin az keçmədən böyük oğlu təyyarə qəzasında həyatını itirib. Evin yeganə oğlu 40 yaşlı Asim ailəyə kömək etmək məqsədilə türk şirkətlərindən birinin dəvəti ilə 2008-ci ildə Qazaxıstana işləməyə gedir.

İki il sonra, 2010-cu il fevralın 2-də Bakıya qayıtmaq istəyən zaman Arman, Tellojan və Dastan adlı polis işçiləri pullarını əlindən almaq üçün onu hədələməyə başlayıblar. Razılaşmadıqda isə onu vəhşicəsinə döyüblər və bildiriblər ki, Qazaxıstandakı pullar burada qalmalıdır. Aldığı xəsarətlərdən Asimin gözləri tutulub, özü isə iflic olub. İki ay komada qalan Asim kliniki ölüm keçirib. Sonra isə onu çox acınacaqlı vəziyyətdə Bakıya gətiriblər. Onu bu hala salanlar isə cəzalandırılmadılar. Qazaxıstan prokurorluğu işi bağladı.

Çarəsiz qalan ananın müraciət etmədiyi, döymədiyi qapı qalmayıb. Lakin bu günə qədər nə ona, nə də əlil arabasına məhkum olunmuş oğluna kömək edən olmayıb. Ona ən çox pis tərsir edən isə oğlunun “Ana, mən yaşamaq istəmirəm! Mən bu vəziyyətimlə kimə lazımam?” deməsidir.

Təbii ki, bu anasının onun üçün necə əzab çəkdiyini görən Asimin əlacsızlıqdan dediyi sözlərdir. O, hər zaman onun qayğısına qalan, öz həyatını ona fəda edən anasına olan borcunu az da ödəmək üçün tezliklə ayağa qalxmağı və dünyalar qədər sevdiyi anasına dəstək olmağı arzulayır.

Sevindirici hal isə ondan ibarətdir ki, Asimin tam sağalması mümkündür. Nazilə xanımın sözlərinə görə, bunun üçün 25-30 min dollar tələb olunur. Bu qədər məbləğin onlar üçün əlçatmaz olduğunu deyən biçarə qadın oğluna yardım etmələri üçün yardımsevər insanlardan kömək gözləyir:

“Xahiş edirəm, oğlumun sağalıb ayağa durmasına kömək edin. O, hələ gəncdir, bütün həyatı qabaqdadır. Xahiş edirəm, yardım edin!”

Aşağıda Nazilə xanımın bank rekvizitlərini təqdim edirik. İstəyən şəxslər (050) 612-90-83 nömrəsinə zəng etməklə Nazilə xanımla əlaqə saxlaya bilərlər.

İnanırıq ki, Nazilə xanımın çağırışına səs verənlər tapılacaq və tezliklə Asim tam sağalaraq gözüyaşlı anasını sevindirəcək!

1news.az