“Erməni diasporu münaqişəyə hər zaman mənfi təsir edib” – Hikmət Çətin
“Türkiyə digər ölkələrdən fərqli olaraq Ermənistanı tanıdı. 1991-ci il 16 dekabrdan Türkiyə Ermənistanı dövlət kimi tanıdı”.
1news.az xəbər verir ki, bunu Türkiyənin sabiq xarici işlər naziri Hikmət Çətin VIII Qlobal Bakı Forumunun "Cənubi Qafqaz: regional inkişaf və əməkdaşlıq üçün perspektivlər" panel müzakirələrində çıxışı zamanı deyib.
"1991-ci ildə Türkiyə, Ermənistan, Rusiya və Amerika xarici işlər nazirlərinin görüşü keçiriləcəkdi. Ancaq axşam saat 11-də Ermənistanın xarici işlər naziri iclasa qatılmadı. Bu da problemin həllinə maneə yaratdı. Ermənistan Azərbaycan torpaqlarını işğal etmişdi. Biz istəyirdik ki, bu məsələ sülh yolu ilə həll olunsun”.
“Erməni diasporu bu məsələrə hər zaman mənfi təsir edib” – deyə, Hikmət Çətin əlavə edib:
“ Ermənistanla bağlı qərarları diaspora verməli deyil, Ermənistan xalqı qərar verməlidir. Mənim vəzifədə olduğum vaxtda Ermənistanın prezidenti bu məsələnin sülh yolu ilə həll olunmasına qarşı idi. 30 il ərzində bu münaqişənin sülh yolu ilə həllini gözləyirdik. Minsk qrupu çox önəmli idi, ancaq onlar heç nə etmədi. Onların fəaliyyəti nəticəsiz oldu. Azərbaycan ilk başdan bu məsələnin sülh yolu ilə həllini dəstəkləyirdi. Ancaq 30 il ərzində bu mümkün olmadı, nəticədə məsələ müharibə yolu ilə həll oldu, Azərbaycan 44 gün ərzində öz torpaqlarını işğaldan azad etdi. Ermənistan liderləri revanşist fikirlərə qapılmamalıdır”.
“Biz inanırıq ki, Türkiyə və Azərbaycanla Ermənistanın diplomatik münasibətləri bərpa olunacaq” – deyə, Hikmət Çətin deyib.
