Azərbaycanlı gənc sahibkar tərəfindən təsis edilən SMART SPINAL SOLUTIONS Silikon Vadisindən 450 000 dollar investisiya əldə edib – FOTO
Azərbaycanda gənc sahibkarların əksəriyyəti üçün ilham mənbəyi olan Arif Mövsümzadə daha bir uğura imza atıb.
19 yaşında o və komanda yoldaşları Vaşinqtonun Sietl şəhərində keçirilən dünyanın ən mühüm startap yarışmalarından birində ikinci yeri qazananda heç kim onu tanımırdı. O, iqtisadiyyatın innovasiya sektorunda mühüm bir iş görmək arzusunda olan gənc sahibkarlar üçün qısa zaman çərçivəsində nümunəyə çevrildi. Bu gün o, Silikon Vadisindən startap üçün vəsait toplaya bilib. Biz onunla məhsul, ABŞ-dakı təcrübəsi və gələcək planları haqqında danışmaq imkanı əldə etdik.
-Salam, Arif bəy. Bizə zaman ayırdığınız üçün təşəkkür edirik. Lia haqqında məlumat verə bilərsinizmi, onun bazardakı digər məhsullardan üstünlüyü nədədir?
-Lia mobil proqram və geyilə bilən texnologiyadan ibarət onurğa əyriliyinin bərpası sistemidir.
Cihaz çiyinlərə taxılır və çiyinlərin, boyunun və belin əsas mövqelərini izləyir. Cihaz yanlış bədən mövqeyini aşkar etdikdə vibrasiya verir. Qeyri-düzgün duruşu aşkar etmək və istifadəçiyə nə edəcəyi ilə bağlı tövsiyə vermək üçün AI istifadə edirik.
Lia bazarda mövcud olan bütün digər cihazlardan fərqlidir. Bu cihazlar yalnız əyilməni müəyyən edə bilər. Lia, öz növünün ilk cihazı olaraq, ümumi duruşun qiymətləndirilməsini, duruş problemlərinə səbəb olan faktorları aşkar etmək üçün sistem və əzələ gərginliyini, bel ağrısını aradan qaldırmaq və düzgün duruşu bərpa etmək məqsədilə məşqlər təkliflərini də özündə cəmləşdirmişdir. Məşq proqramlarının hamısı həkimlər tərəfindən hazırlanır. Daha geniş məlumat üçün wearlia.com saytına keçid edə bilərsiniz.
-Siz çox gəncsiniz və indi uğurlu startap şirkətinə rəhbərlik edirsiniz. Lia-nın inkişafındakı rolunuz barədə bizə bir az məlumat verə bilərsinizmi?
-Əlbəttə. Mən Smart Spinal Solutions şirkətində texniki direktoram. Şirkətimiz belə adlanır. Həm aparat, həm də proqram təminatı üzrə inkişaf komandamız Bakıda, Azərbaycanda yerləşir. Mən əsasən onlara rəhbərlik etməkdə məsuliyyət daşıyıram. Aparat təminatı komandamız 5 nəfərdən, proqram təminatı komandamız isə 7 nəfərdən ibarətdir. Məsulliyyətlərim işçi heyətini idarə etmək və məhsulun bütün texniki aspektlərinə nəzarət etməkdən ibarətdir.Tezliklə, marketinq kampaniyamızdan sonra mən də məhsulun istehsalı və yığılmasına cavabdeh olacağam ki, biz onu alıcılarımıza çatdıra bilək.
-Siz Azərbaycanda ABŞ-dan uğurla investisiya cəlb edən ilk startap şirkətisiniz. Amerikaya səfəriniz və amerikalı investorlardan sərmayələr almağınız barədə məlumat verə bilərsiniz?
-Amerikaya investisiya tapmaq üçün getmişdik. Orada biz məhsulu necə təkmilləşdirmək barədə daha çox məlumat əldə etdik və həmçinin Angel İnvestor klubları və VC fondları ilə çoxsaylı görüşlər keçirdik. Çoxlu görüşlər baş tutdu, imtinalar oldu, amma sonda biz lazımi investorları tapa bildik. İlk dəfədir ki, Azərbaycana məxsus startap ABŞ-da vəsait toplayıb.
-Bir çox yeni startaplar da investorları, xüsusən də ABŞ-dakıları cəlb etməkdə maraqlı ola bilər. İnvestorları daha çox hansı maraqlandırır?
-İnvestorlar ilk növbədə məhsulun hansı problemi həll etdiyinə və məhsulu yaradacaq komandaya diqqət yetirirlər. Başlanğıc komandası məhsulu kimin üçün hazırladıqlarını, bu məhsulun necə kömək edə biləcəyini və məhsulun rəqibləri ilə müqayisədə hansı üstünlüklərə malik olduğunu aydın başa düşməlidir. Onlar da,təbii ki, məhsul satışının bütün dünyaya necə yayılacağı ilə bağlı çoxlu suallar verirlər.
-Süni intellekt məhsulunuzda necə rol oynayır?
-Lia süni intellektlə təchiz edilib və yaşından, bədən quruluşundan və görünüşündən asılı olmayaraq hər bir istifadəçiyə fərdi yanaşma təmin edir. Təlim proqramı hər bir insan növü üçün fərdi olaraq hazırlanacaq. Həm də süni intellekt onurğanın yanlış mövqeyini müəyyən etmək üçün istifadə olunur.
-Məhsulu hazırlayarkən hansı çətinliklərlə üzləşdiniz?
-Məhsulun hazırlanmasında əsas problemlərdən biri COVID-19 pandemiyası şəraitində uzaq məsafədən işləməkdir. Diqqətimizi müvəqqəti olaraq məhsul təhlilinə doğru dəyişməli olduq, digər çətinlik isə ölkə daxilində lazımi resursların olmamasıdır. Biz müxtəlif ölkələrin şirkətləri ilə sıx əməkdaşlıq edirik - Çində PCB istehsalı, Türkiyədə məhsul dizaynının hazırlanması və Azərbaycana bağlamaların çatdırılması 2 həftədən 6 həftəyə qədər davam edir ki, bu da işin tempinə təsir göstərir. Düşünürəm ki, komandam və mən bu çətinliklərin öhdəsindən gəlmək üçün böyük səy göstərdik.
-Gələcək üçün hədəfləriniz nədir?
-İndi bizim əsas vəzifəmiz məhsulu tamamlamaq və satışa başlamaqdır, biz əvvəlcə IndiGogo platformasından istifadə edərək, sonra isə onlayn portallardan birbaşa satışlar vasitəsilə satışa başlamağı planlaşdırırıq.
-Məhsulunuz satışa çıxarıldıqdan sonra nə etmək istərdiniz?
-Hazırda yeni məhsullar üçün bir neçə ideyam var. Mən ümid edirəm ki, gələn ilin əvvəlinə kimi onları da həyata keçirmək üçün vaxt ayıra biləcəm.
Reklam hüququnda
