“Azərbaycan torpaqlarının işğal altında saxlanılmasına görə Minsk qrupu da Ermənistan qədər məsuliyyət daşıyır” - Ekspert
1992-ci ildə Ermənistanla Azərbaycan arasındakı münaqişənin həll edilməsi məqsədi ilə yaradılan ATƏT-in Minsk qrupu uzun illər ərzində sülh danışıqları prosesində iştirak etsə də, əslində münaqişənin həlli ilə deyil, onun uzadılması ilə məşğul olub. Bu da ölkəmizə qarşı olan ikili standartlardan irəli gəlib.
Ordumuzun möhtəşəm qələbəsi ilə başa çatan İkinci Qarabağ müharibəsindən sonra isə Minsk qrupu əhəmiyyətsiz bir quruma çevrildi. Çünki uzun illər ərzində onun həll edə bilmədiyi münaqişəni Azərbaycan öz gücü ilə həll etdi, bununla həm də BMT-nin kağız üzərində qalan qətnamələrinin icrasını da yerinə yetirmiş oldu.
Minsk qrupunun münaqişənin həlli ilə bağlı heç bir iş görməməsinə və Azərbaycanın işğal altında qalmış ərazilərini öz hərbi gücü hesabına azad etməsinə baxmayaraq, Ermənistan və onun havadarları vaxtaşırı Minsk qrupunu yenidən gündəmə gətirirlər.
Azərbaycan Prezidenti İlham Əliyev də bu əbəs cəhdlərlə bağlı fikirlərini dəfələrlə dilə gətirib və artıq Minsk qrupuna ehtiyac olmadığını qeyd edib:
“ATƏT-dən mandat alan Minsk qrupu 28 il ərzində heç bir nəticə əldə etməyib. Ona görə də Azərbaycan Qarabağ münaqişəsini həll edəndən sonra Minsk qrupuna ehtiyac qalmayıb”.
Bununla bağlı 1news.az-a açıqlama verən siyasi ekspert Elçin Mirzəbəyli Minsk qrupunun üzərinə düşən heç bir öhdəliyi yerinə yetirə bilmədiyini və yaşanan hər şeyə görə Ermənistan qədər Minsk qrupunun da məsuliyyət daşıdığını qeyd edib:
“Minsk qrupu bütövlükdə Azərbaycan torpaqlarının Ermənistan tərəfindən işğal altında saxlanılmasına, ərazilərin viran qoyulmasına, abidələrin dağıdılmasına, 1 milyon insanın öz evindən didərgin düşməsinə, məhrumiyyətlər yaşamasına görə Ermənistan qədər məsuliyyət daşıyır. Çünki BMT qətnamələrinin icrası istiqamətində müvafiq addımlar atılması həmsədrlərin üzərinə düşürdü. Hər üç həmsədr prinsip etibarilə həm də BMT Təhlükəsizlik Şurasının daimi üzvləridir və onlar Azərbaycan ərazilərinin qeyd-şərtsiz azad olunması ilə bağlı BMT qətnamələrinə səs vermişlər. Bütün bunların fonunda yenidən “Minsk qrupu” sözünün dilə gətirilməsi ən azı ayıbdır və bir dövlət olaraq özünə sayğı duyan ölkələr, xüsusən də ABŞ və Fransa öz imzalarına hörmət etməli və bu müddət əzrində işğalçı ilə işğala məruz qalan arasında bərabərlik işarəsi qoyduqlarına görə xəcalət çəkməlidirlər. “Minsk qrupu” sözü bütövlükdə bölgənin, eyni zamanda ATƏT-in Minsk qrupu həmsədrlərinin tarixinə bir utanc və qara ləkə kimi yazılıb”.
Siyasi ekspert, həmçinin Ermənistanın öz öhdəliklərini yerinə yetirməkdən boyun qaçırması ilə bağlı da fikirlərini bildirib:
“Ermənistanın öhdəlikləri yerinə yetirməkdən başqa çıxış yolu yoxdur. İndiki şəraitdə Brüssel prosesi və 10 Noyabr Bəyanatının prinsipləri və müddəaları, Azərbaycanın qələbəsi nəticəsində regionda yaranmış yeni reallıq Ermənistana seçim etmək üçün imkan vermir. Paradoksal görünsə də, Ermənistanın mövcud şəraitdə yeganə çıxış yolu, hətta erməni xalqının xoşbəxtliyi belə 10 Noyabr Bəyanatının şərtlərinə əməl etməkdir. Əks təqdirdə biz Ermənistanı buna məcbur etməyin yolunu bilirik. Necə öz ərazi bütövlüyümüzü təmin etmişiksə, eyni qaydada müvafiq addımlar da ata bilərik.
Bu gün tarixi sənədlər və Ermənistan adlanan dövlətin ərazisində yaşayan insanların qeydiyyata alınması ilə bağlı sənədlər sübuta yetirir ki, həmin ərazilərdə yaşayanların mütləq əksəriyyəti azərbaycanlılar olub. Digər tərəfdən azərbaycanlılar Ermənistan ərazisindən sovet dövründə deportasiya ediliblər. SSR-nin süqutundan bir müddət əvvəl də 200 mindən çox Azərbaycanlı öz torpaqlarından qovulub və həmin torpaqlar Azərbaycan xalqına məxsusdur. Bu aspektdən Ermənistan öz öhdəliklərini yerinə yetirməyəcəyi təqdirdə Azərbaycan tərəfinin bu məsələni qaldırmağa tamamilə hüququ çatır. Bu öz torpağından qovulmuş azərbaycanlıların bütün fundamental hüquqlar tərəfindən beynəlxalq hüquq müstəvisində tanınmış hüquqlarıdır. Azərbaycan bu istiqamətdə tam hüquqi müstəvidə addım atmaq imkanına və potensialına malikdir”.
Ayşən İsmayılova
