Deputat: “Ermənilər gec-tez seçim etməlidirlər” - ŞƏRH
“Azərbaycan 44 günlük Vətən müharibəsində Qarabağ və Şərqi Zəngəzuru işğaldan azad etdi”.
Bunu 1news.az-a açıqlamasında Milli Məclisin deputatı Naqif Həmzəyev deyib.
“Yalnız Xankəndi və onun ətrafında olan ərzilərdə erməniəsilli insanlar yaşamaqdadırlar. Çox təəssüf ki, burada normal vətəndaşlarla yanaşı separatçı qüvvələr də yaşayır. Üçtərəfli bəyənatın müddəalarına əsasən rus sülhməramlılarının bu əraziyə daxil olduğu müddətlə paralel olaraq ermənilərin silahlı dəstələri bu əraziləri tərk etməliydi, ancaq hələ də bu proses baş tutmayıb. Hələ də separatçıların və Ermənistan silahlı qüvvələrinin bir hissəsi bu ərazilərdə qanunsuz olaraq mövcudiyyətini davam etdirir”.
Deputat qeyd edib ki, Azərbaycan ilk növbədə həmin silahlı dəstələrin buradan çıxarılmasını tələb edir və buna ən qısa zamanda nail olacaq.
“Daha sonrakı prosesdə isə məhz 1992-ci ilədək bu ərazilərdə yaşamış, Azərbaycan vətəndaşı olmuş və həmin insanların hazırkı övladları, nəvələri və yaxud ən yaxın qohumlarının siyahıları müəyyənləşdiriləcək və bu ərazidə Azərbaycan vətəndaşlığını qəbul edərək öz həyatlarını davam etdirəcək. Yəni burada sadə bir məntiq var. Azərbaycan vətəndaşı olmuş insanlar istədikləri təqdirdə təkrarən Azərbaycan vətəndaşlığını qəbul edəcək və Azərbaycanda yaşayacaqlar. Azərbaycan tərəfi isə onların həm təhlükəsizliyinin, həm sosial təminatının təşkilini həyata keçirəcək".
"Qarabağ və Şərqi Zəngəzurda həyata keçirilən quruculuq işləri bu ərazilərdə də tətbiq olunacaq və Azərbaycanın ən inkişaf etmiş ərazilərindən birinə çevriləcəkdir" -deyə, deputat əlavə edib:
"Düşünürəm ki, ermənilər bu seçimi gec-tez etməlidirlər. Prosesləri uzatmaq olmaz. Separatçı qüvvələr tərəfindən dustaq saxlanılan erməniəsilli vətəndaşlara azadlıq verilməlidir və onlar öz seçimlərini özləri etməlidir. Azərbaycan vətəndaşlığını qəbul etməyən erməniəsilli həmin insanlar isə asanlıqla Laçın yolu vasitəsilə bu əraziləri tərk edə və Ermənistana gedib Ermənistan vətəndaşlığını qəbul edə bilərlər”.
