“Biz bundan sonra daha böyük eskalasiyaların şahidi ola bilərik” – Politoloqdan ŞƏRH
“Azərbaycanı təxribata çəkə bilməzlər”.
Bu sözləri 1news.az-a “Bakı Politoloqlar Klubu” İctimai Birliyinin sədri Zaur Məmmədov Ermənistan ordusunun təxribatları ilə bağlı açıqlamasında deyib.
Politoloq bildirib ki, Azərbaycan gələcəkdə prosesləri çox düzgün proqnozlaşdırır. Onlar isə elə özləri özlərini təxribata çəkirlər və bölgədə sülh müqaviləsi imzalanmaması üçün hər şey edirlər:
“Bu kimə lazımdır? Bu gün Nikol Paşinyana sülh müqaviləsinin imzalanmaması və Azərbaycanla yeni müharibə lazımdırmı? Bu gün Ermənistan müdafiə naziri doğrudan da mı öz ordusunu Azərbaycana qarşı döyüşdürmək əzmindədir? Bir çox suallar yaranır. Bu sualların cavabını bu vəya digər şəkildə çox dərindən düşünərək tapmaq olar.
Ermənistan ordusunun nümayəndələri dünən bir neçə istiqamətdən Azərbaycan ordusuna atəş açdılar. Laçında - sərhəd məntəqəsində Azərbaycan ordusuna mane olmağa çalışdılar. Bu ondan xəbər verir ki, müəyyən qüvvələr iki ölkə arasında sülh müqaviləsinin bağlanmasına mane olmaq istəyirlər. Bu bir siqnaldır. Biz bundan sonra həm Qarabağın dağlıq hissəsində, həm də sərhədyanı ərazilərdə daha böyük eskalasiyaların şahidi ola bilərik. Amma Azərbaycan ordusu bütün eskalasiyaların şahidi ola biləcək və bayrağımız dünən Həkəri çayının sahilindən necə asıldısa, digər yerlərdən də asılacaq”.
Zaur Məmmədov son olaraq Ermənistan tərəfinin bu cür təxribatlara davam edəcəyi təqdirdə doğacaq nəticələrdən də bəhs edib:
“Ermənistan müxalifəti və sülh müqaviləsinin bağlanmasını istəməyənlər bilsinlər və agah olsunlar ki, 21-ci əsrin sonunda Ermənistan dövlətinin aqibəti sual altında olacaq. Onlar oturduqları topraqlara görə şükür etsinlər. Əks təqdirdə onlar üçün vəziyyət çox ağır olacaq”.
Xatırladaq ki, 15 iyun 2023-cü il tarixdə saat 08:45-də Ermənistan Respublikası ərazisindən açılmış atəş nəticəsində Laçın dövlət sərhədindən buraxılış məntəqəsində xidmət aparan Dövlət Sərhəd Xidmətinin hərbi qulluqçusu yaralanıb. Bundan əlavə, iyunun 16-sı Naxçıvan Muxtar Respublikası, habelə Gədəbəy və Şuşa rayonları istiqamətində yerləşən mövqeləri də müxtəlif çaplı atıcı silahlardan atəşə tutub.
