“Göndərilən yardımın qəbul olunmaması onu göstərir ki...” - Deputat
“Göndərilən yardımın qəbul olunmaması onu göstərir ki, Qarabağda heç bir aclıq yoxdur”.
Bu sözləri Milli Məclisin deputatı Ceyhun Məmmədov Azərbaycan tərəfindən Qarabağda yaşayan erməni əsilli sakinlər üçün göndərilən humanitar yardımın Ağdam-Xankəndi yolunda gözlədilməsi ilə bağlı 1news.az-a danışarkən deyib.
“Bu daha çox süni formada yaradılmış bir ajiotajdır və Ermənistanın yaratdığı tır şousunun növbəti tərkib hissəsidir. Əgər həqiqətən də elə bir aclıq olsaydı, bu gün ermənilər həmin yükü qəbul edərdilər. Bu da onu göstərir ki, orada hansısa bir humanitar böhran yoxdur. Bu daha çox ermənilərin təbliğat məqsədilə istifadə etdikləri məsələdir. Bu gün ac olan insan küçələrə çıxıb “bizə türkün çörəyi lazım deyil” deməz. Bu daha çox Ermənistanın çirkin məqsədlərini və niyyətini yerinə yetirmək üçün ortaya atılan bir məsələdir.
Deputat qeyd edib ki, ermənilər onu da bilməlidirlər ki, bu cəhdlərinin heç bir perspektivləri olmayacaq və heç bir effekt verməyəcək.
“Onlar çalışmalıdırlar ki, belə təxribatlara son qoysunlar. Bu addımları atdıqca əks nəticəsi daha çox olacaq. Çünki Azərbaycan sona kimi öz mövqeyini müdafiə edəcək. Yaxşı olar ki, Ermənistan bölgəyə sülhün gəlməsi üçün real və ciddi addımlar atsın”.
Xatırladaq ki, Azərbaycan Qızıl Aypara Cəmiyyəti (AzQAC) tərəfindən Qarabağda yaşayan erməniəsilli sakinlərin ehtiyaclarını qarşılamaq üçün Bakıdan göndərilən 40 ton un, artıq 8-ci gündür ki, mənzil başına çatmaq üçün aparılan danışıqların nəticəsini gözləyir.
