Nasir Əbdüləziz Əl-Nasir: “Bakı Forumu qarşıda duran məqsədlərə çatmaq yolunda qətiyyətli addımdır”

“Gənclər bizim fəaliyyətimizin əsas dayaqlarından biridir. Biz Bakıda toplaşaraq inklüziv cəmiyyətlər qurmaq istiqamətində gənclərin fikir və düşüncələrini, təkliflərini eşitmək üçün müzakirələr aparırıq. Bu mühüm platformaya şərait yaratdığına görə Azərbaycan hökumətinə dərin minnətdarlığımı bildirirəm”.

1news.az-ın AZƏRTAC-a istinadla verdiyi xəbərə görə, bu sözləri BMT-nin Sivilizasiyalar Alyansı (UNAC) üzrə ali nümayəndəsi Nasir Əbdüləziz Əl-Nasir Alyansın VII Qlobal Forumu çərçivəsində keçirilən Gənclər Forumunda çıxış edərkən söyləyib.

Tədbirin əhəmiyyətini yüksək qiymətləndirən və onun nəticələrinin müsbət olacağına əminliyini bildirən Nasir Əbdüləziz Əl-Nasir VII Qlobal Forumun qarşıda duran məqsədlərə çatmaq yolunda qətiyyətli addım olduğunu vurğulayıb.

Qeyd edib ki, Gənclər Forumu mədəniyyətlərarası dialoq, təhsil, əməkdaşlıq və s. kimi konkret hədəflərə istiqamətlənib.

“Biz inklüziv cəmiyyətlər olmadan qarşıya qoyulan məqsədlərə nail ola bilmərik. Biz məhz gənclərin düşüncələri, fəaliyyətləri və təşəbbüsləri nəticəsində dünyanı daha yaxşı məkana çevirə bilərik”, - deyə BMT-nin Sivilizasiyalar Alyansı üzrə ali nümayəndəsi vurğulayıb.

1news.az