Azərbaycanda qanunsuz ov edən ərəblər su kanalında boğuldular
Ov üçün Azərbaycana gələn ərəblər su kanalına düşərək ölüblər.
1news.az-ın Daxili İşlər Nazirliyinə istinadən verdiyi xəbərə görə, hadisə fevralın 8-də saat 20:00 radələrində İmişli rayonunun Xəlfəli kəndində baş verib.
Belə ki, Qətər vətəndaşı Salim Ali Said Əlməri icarəyə götürdüyü “Toyota” markalı avtomobili idarə edərkən körpüdən kanala aşırıb.
Nəticədə S.Əlməri və sərnişinlərindən - Səudiyyə Ərəbistanı vətəndaşı Melşari Zaid Əl Subeyd suda boğularaq ölüb, digər sərnişini, həmyerlisi Əbdüləziz Əl Kabiyə xəstəxanada ilkin tibbi yardım göstərildikdən sonra buraxılıb.
Ekologiya və Təbii Sərvətlər Nazirliyinin (ETSN) mətbuat xidmətindən Oxu.Az-a bildiriblər ki, İmişli rayonunda su kanalında batan xarici ölkə vətəndaşlarına ov icazəsi verilməyib.
Aparılan araşdırmalar zamanı məlum olub ki, həmin şəxslər, Səudiyyə Ərəbistanı və Qətər vətəndaşları və onları ölkəyə dəvət edənlər tərəfindən müvafiq ov icazəsinin alınması üçün Ekologiya və Təbii Sərvətlər Nazirliyinə hər hansı müraciət olunmayıb.
Faktla bağlı İmişli Rayon Polis Şöbəsi tərəfindən araşdırma aparılır.
1news.az
