Vergilər Nazirliyi Azərbaycanda yeni vergi güzəştlərinin tətbiqi məsələsinə aydınlıq gətirib

Azərbaycan Vergilər Nazirliyi sahibkarlıq subyektləri üçün ölkənin yeni vergi güzəştlərinin tətbiqi münasibət bildirib.

1news.az-ın məlumatına görə, Bakıda “Azərbaycanda vergi sistemi: reallıqlar və perspektivlər” mövzusunda keçirilən V Vergi Forumu zamanı jurnalistlərin suallarını cavablandıran vergilər nazirinin müavini Sahib Ələkbərov bildirib ki, yaxın gələcəkdə ölkədə əlavə vergi güzəştlərinin tətbiqi gözlənilmir.

“Vergi güzəştləri dedikdə nə nəzərdə tutulur? Bu sahibkarlar üçün əlavə şəraitin yaradılmasıdır. Lakin son illər ərzində Azərbaycanda bu sahədə böyük işlər görülüb. Məsələn, kənd təsərrüfatı sahəsi demək olar ki vergidən azad olunub. 2 milyard manata yaxın vəsait fermerlərin ixtiyarında qalıb. Bu yaxınlarda isə buğdanın idxalı və satışı, buğda unu və çörəyin istehsalı və satışı ƏDV-dən azad olunub”,- S.Ələkbərov deyib.
 
Nazir müavini qeyd edib ki, vergi yükünün azaldılması mütəmadi həyata keçirilə bilməz. Bu yalnız uyğun şərait yarandıqda mümkündür.
“Əgər biz daimi olaraq vergi yükünü azaltsaq müəllimlərin, həkimlərin və büdcədən maliyyələşən digər təşkilatların əmək haqqı hansı vəsait hesabına veriləcək?”, - deyə nazir müavini bildirib.

1news.az