Qış məktəbi Bakı Slavyan Universitetində silsilə mühazirələrlə işini davam etdirib - FOTO
Bakı Beynəlxalq Multikulturalizm Mərkəzi (BBMM), Azərbaycan Respublikasının Prezidenti yanında Bilik Fondu və Bakı Slavyan Universitetinin (BSU) birgə təşkilatçılığı ilə fəaliyyət göstərən “Multikulturalizm Azərbaycanda həyat tərzi kimi: öyrən, araşdır, paylaş-2016” adlı Beynəlxalq Multikulturalizm qış məktəbi davam edir.
Fevralın 13-də tələbələr BSU-nun Rusiya Mədəniyyət Mərkəzində Moskva Açıq Təhsil İnstitutunun UNESCO beynəlxalq təhsil və miqrant uşaqların məktəbə inteqrasiyası kafedrasının müdiri, professor Yuri Qoryaçevin “Rusiyanın təhsil sistemində multikulturalizm məsələləri” mövzusunda mühazirəsini dinləyiblər.
Professor ölkəsinin və paytaxt Moskvanın təhsil sistemində multikulturalizm məsələlərinin tədris edilməsi mexanizmlərini təqdim edib. O, BMT və UNESCO səviyyəsində qəbul edilmiş beynəlxalq qanunverici və tövsiyəedici xarakter daşıyan aktların tətbiq edilməsinin vacibliyini vurğulayaraq, Rusiyada tətbiq edilən yanaşmaların mahiyyətini qış məktəbi iştirakçılarının diqqətinə çatdırıb: “Rusiyada rəsmi səviyyədə “Millətlərarası münasibətlərinin strategiyası” adlı sənədin qəbul edilməsinin tolerantlıq mühitinin möhkəmlənməsinə birbaşa aidiyyətinin olması şübhə doğurmur. Sözügedən vacib sahədə Azərbaycanda əldə edilmiş unikal təcrübə həm də universal mahiyyətə malik olduğundan ondan bəhrələnməyə geniş imkanlar açır”.
Mühazirə əsnasında Bakı Slavyan Universitetinin Multikulturalizm kafedrası ilə Rusiyanın “Etnosfer” Beynəlxalq Təhsil Mərkəzi arasında əməkdaşlıq barədə müqavilə imzalanıb. Müqaviləyə əsasən hər iki qurumun gələcəkdə elmi-tətbiqi araşdırmalar sahəsindəki qarşılıqlı əlaqələrinin gücləndirilməsi nəzərdə tutulub.
Sonra BSU-nun Türkiyə Araşdırmalar Mərkəzində Beynəlxalq Türk Akademiyasının prezidenti, professor Darhan Kıdırali (Qazaxıstan) “Türkdilli ölkələrdə multikulturalizm siyasəti” mövzusunda mühazirə ilə çıxış edib. Mühazirədə konkret faktlar və məlumatlar əsasında türkdilli xalqlara əzəldən multikultural ənənələrin xas olduğu bildirilib: “Hələ qədim dövrlərdən türkdilli dövlətlər polietnik və polikonfessional olduqlarına görə müxtəlif dövrlərdə məhz tolerant insanın formalaşmasına böyük meydan verirdilər.
Hazırda mövcud türkdilli məmləkətlərin hamısının cəmiyyəti müxtəlif mədəniyyətlərə mənsub toplumlardan ibarətdir və daxili sabitliyin qorunub möhkəmlənməsi yolunda dözümlülük və başqa mədəniyyətlərə sayğılı münasibət müstəsna rol oynayır. Azərbaycan, Qazaxıstan, Türkiyə belə ölkələrdəndir”.
Tədbirdə BBMM-in müşaviri, professor Aytən Qəhrəman və professor Darhan Kıdırali BBMM və BTA arasında əməkdaşlıq barədə müqavilə imzalayıblar. Müqaviləyə əsasən ən yaxın zamanda adıçəkilən iki mərkəz həm elm, həm də tətbiqi sahədə araşdırma və birgə layihələrin həyata keçirilməsini təmin edəcək.
BBMM-in Lissabon nümayəndəliyinin rəhbəri, Lusofona Universitetinin beynəlxalq əlaqələr departamentinin direktoru, professor Teresa Damasionun (Portuqaliya) “Yeni dünya nizamı və multikulturalizm” mövzusunda mühazirəsi də tələbələrin xüsusi marağına səbəb olub.
