Gəncədə gənc əsgərlərin andiçmə mərasimi keçirilib - FOTO
Fevralın 14-də Gəncədə Müdafiə Nazirliyinin N hərbi hissəsində gənc əsgərlərin andiçmə mərasimi keçirilib.
AZƏRTAC xəbər verir ki, hərbi hissənin ərazisində təşkil edilən mərasimdə ənənəyə uyğun olaraq Döyüş bayrağı meydana gətirilərək Dövlət himni səsləndirilib. Azərbaycanın ərazi bütövlüyü uğrunda həlak olan şəhidlərin xatirəsi birdəqiqəlik sükutla yad edilib.
Sonra gənc əsgərlər hərbi and içiblər.
Andiçmə mərasimində hərbi hissənin komandanlığı, yerli icra orqanlarının təmsilçiləri, veteranlar, valideynlər, həmçinin ictimaiyyət nümayəndələri iştirak edib.
Mərasimdə çıxış edənlər gənc əsgərlərə nümunəvi olmağı, silah və texnikanın sirlərinə dərindən yiyələnərək döyüş qabiliyyətlərini daim artırmağı, komandir-rəis heyətinin əmr və sərəncamlarını dəqiq və vaxtında yerinə yetirməyi, işğal olunmuş torpaqlarımızın azadlığı uğrunda döyüşə hər an hazır olmağı tövsiyə edib, xoş arzularını bildiriblər.
Rəsmi mərasim başa çatdıqdan sonra konsert proqramı nümayiş etdirilib.
Sonra valideynlər hərbi hissədə yaradılmış şəraitlə tanış olublar.
