Şəkinin Türk dünyasının mədəniyyət paytaxtı elan olunması ilə bağlı tədbirlər planı müzakirə olunub – FOTO
Mədəniyyət və Turizm Nazirliyində Şəki şəhərinin 2016-cı il üçün Türk dünyasının mədəniyyət paytaxtı elan olunması ilə bağlı tədbirlər planının müzakirəsinə həsr olunmuş görüş keçirilib.
Nazirliyin mətbuat xidmətindən 1news.az-a bildirilib ki, iclasda çıxış edən mədəniyyət və turizm naziri Əbülfəs Qarayev Şəki şəhərin tarixi əhəmiyyətinin turizm məqsədləri üçün istifadəsinin vacib olduğunu söyləyib.
Şəkinin Türk dünyasının mədəniyyət paytaxtı elan olunmasından bəhs edən nazir qeyd edib ki, il ərzində silsilə tədbirlər keçiriləcək.
Azərbaycan Respublikasının Prezidenti İlham Əliyevin 19 yanvar 2016-cı il tarixli “Şəki şəhərinin tarixi hissəsinin qorunması haqqında” imzaladığı Sərəncamın əhəmiyyətindən danışan nazir, bu tarixi sənətdə əksini tapan məsələlərin yüksək səviyyədə icra olunmasının vacibliyini bildirib.
Ə.Qarayev qeyd edib ki, Şəki şəhərinin UNESCO-nun Dünya İrsi Siyahısına daxil edilməsi ilə bağlı sənədlər təşkilata təqdim edilib.
Tədbirdə iştirak edən Şəki Şəhər İcra Hakimiyyətinin başçısı Elxan Usubov deyib ki, hazırda Şəkidə 84 tarix və mədəniyyət abidəsi mövcuddur və həmin abidələr artıq turizm nümayiş obyektinə çevrilib. Təsadüfi deyil ki, hər il Şəkidə 4 beynəlxalq festival təşkil olunur. Bu tədbirlərin də iştirakçılarının çoxunu xarici turistlər təşkil edir. Son illər Şəkinin turizm potensialı turistlərin cəlb olunması üçün geniş istifadə olunur. Ötən il 120 min turist Şəkiyə səfər edib.
Daha sonra görüşdə tədbirlər planının bütün bəndləri üzrə müzakirələr aparılıb. Tədbirlər planına əsasən, təntənəli açılış mərasimi, folklor və musiqi kollektivlərinin konserti, atüstü milli oyunlar festivalı, xalq tətbiqi sənət ustalarının və rəssamların əsərlərindən ibarət sərgi, şeir müsabiqələri, festivallar və bağlanış mərasimi kimi tədbirlər müzakirə olunub.
Qeyd edək ki, Şəki şəhəri Beynəlxalq Türk Mədəniyyəti Təşkilatının (TÜRKSOY) Mədəniyyət Nazirlərinin Daimi Şurasının 33-cü toplantısı çərçivəsində Türkmənistanın Marı şəhərində keçirilən mədəniyyət məsələləri üzrə məsul nazirlərin toplantısında 2016-cı il üçün Türk dünyasının mədəniyyət paytaxtı seçilib.
1news.az
