Nardaranda yanğından mühafizə bölməsinin açılışı olub
Nardaran qəsəbəsində Fövqəladə Hallar Nazirliyinin (FHN) Dövlət Yanğından Mühafizə Xidmətinin Sabunçu Rayon Dövlət Yanğından Mühafizə Hissəsinin 24 nömrəli yanğından mühafizə bölməsinin açılışı olub.
1news.az-ın verdiyi xəbərə görə, açılış mərasimində fövqəladə hallar nazirinin müavini Etibar Mirzəyev, Sabunçu Rayon İcra Hakimiyyətinin başçısı Adil Vəliyev iştirak ediblər.
Məlumat verilib ki, ən yüksək standartlara cavab verən müasir avadanlıqla təchiz olunan binada şəxsi heyətin fəaliyyəti üçün hər cür şərait yaradılıb. Binanın foyesində Azərbaycan xalqının ümummilli lideri Heydər Əliyevin və Prezident İlham Əliyevin fəaliyyətini əks etdirən fotolardan ibarət guşə yaradılıb.
Bölmənin ərazisində yanğın deposu, nəzarət-buraxılış məntəqəsi, qazanxana, nasosxana, su anbarı, avtoyuma inşa olunub. Bundan başqa, inzibati binada dispetçer, tədris, qəbul və istirahət otaqları, yeməkxana da var. Bölmə ən müasir yanğınsöndürmə avtomobilləri ilə təmin edilib.
Qeyd edilib ki, 30 nəfərdən ibarət şəxsi heyəti olan bölmənin ərazisi 900 kvadratmetrdir. Bölmənin istifadəyə verilməsi bu ərazidə yanğın təhlükəsizliyinin daha etibarlı təmin edilməsi və yanğınsöndürmə tədbirlərinin operativ həyata keçirilməsini asanlaşdıracaq.
Nazir müavini E.Mirzəyev jurnalistlərə açıqlamasında deyib ki, 24 nömrəli yanğından mühafizə bölməsi Nardaran qəsəbəsinin sosial-iqtisadi inkişafi ilə bağlı Azərbaycan Prezidenti İlham Əliyevin 2015-ci ilin dekabrında imzaladığı Sərəncama əsasən istifadəyə verilib.
Nazir müavini gələcəkdə bölmə əməkdaşlarının 60 faizinin Nardaran sakinlərindən ibarət olacağını, artıq bununla bağlı gənclərin ərizələrinin qəbul edildiyini bildirib.
E. Mirzəyev Nardaran gənclərinin Dövlət Yanğından Mühafizə Xidmətinin Bakının digər rayonlarındakı hissə və bölmələrdə də işə qəbul ediləcəyini qeyd edib. O, əvvəllər Nardaranda baş verən hadisələr zamanı Bakının digər rayonlarından yanğınsöndürənlərin cəlb olunduğunu, bunun da vaxt itkisinə səbəb olduğunu söyləyib:
“Bölmənin istifadəyə verilməsi bu ərazidə yanğın təhlükəsizliyinin daha etibarlı təmin edilməsi və yanğınsöndürmə tədbirlərinin operativ həyata keçirilməsini asanlaşdıracaq”.
1news.az
