Çətin həyat şəraitində olan uşaqlara və ailələrə günərzi sosial xidmətlər göstəriləcək

Əmək və Əhalinin Sosial Müdafiəsi Nazirliyi əlilliyi olan şəxslərə və sağlamlıq imkanları məhdud uşaqlarla bağlı tədbirlərini davam etdirir.

1news.az-ın məlumatına görə, bu istiqamətlərdən biri kimi, ölkənin ayrı-ayrı rayonlarında uşaqların dövlət uşaq müəssisələrinə düşməsinin qarşısının alınması və çətin həyat şəraitində olan uşaqların, ailələrin sosial xidmətlərə çıxışının təmin edilməsi məqsədi ilə ixtisaslaşmış vətəndaş cəmiyyətləri tərəfindən günərzi xidmətlərin göstərilməsi nəzərdə tutulur.

Fəaliyyət istiqamətləri sırasına 7 yaşadək uşaqlar arasında əlilliyin qarşısının alınması və sağlamlıq imkanları məhdud uşaqların Portec metodikası ilə sosial reabilitasiyası, bu təbəqədən olan uşaqlar və əlilliyi olan şəxslər arasında idman tədbirlərinin keçirilməsi, onların beynəlxalq yarışlarda iştirakına şərait yaradılması da daxildir.

Görmə imkanları məhdud olan uşaqlara xüsusi proqramlar vasitəsilə idman, incəsənət və xalq sənəti növlərinin öyrənilməsinə yardım göstərilməsi, eşitmə və nitq qabiliyyəti olmayan sağlamlıq imkanları məhdud uşaqların surdoloji xidmətlərlə təmin olunması da nəzərdə tutulur.

Sosial təhlükəli vəziyyətdə olan kimsəsiz uşaqların sosial reabilitasiyası, əlilliyi olan şəxslərə və sağlamlıq imkanları məhdud uşaqlara diqqət və qayğının artırılması məqsədi ilə təbliğat işinin gücləndirilməsi və s. də fəaliyyət istiqamətlərinə daxildir.

Nazirlikdən verilən məlumata görə, 2015-ci ildə nazirliyin sosial sifarişlər əsasında ixtisaslaşmış QHT-lər tərəfindən ümumilikdə 1500 nəfərdən çox sağlamlıq imkanları məhdud və ya çətin həyat şəraitində olan uşaq, eləcə də müvafiq hallarda onların ailələri sosial və reabilitasiya yönümlü xidmətlərlə təmin olunub.

1news.az