Bakıda Yeni Türkan qəsəbəsi salınacaq
“Böyük Bakının Regional İnkişaf Planı” layihəsinə uyğun olaraq Bakı ərazisində Yeni Türkan qəsəbəsi yaradılacaq.
1news.az AZƏRTAC-a istinadən xəbər verir ki, bu barədə Dövlət Şəhərsalma və Arxitektura Komitəsindən məlumat verilib.
Layihəyə əsasən, qəsəbənin mərkəzi küçələrində 3-5 mərtəbəli terras tipli yaşayış binaları və ətrafda həyətyanı sahəyə malik fərdi evlərin layihələndirilməsi nəzərdə tutulur. Həmçinin inzibati, sənaye, sosial-mədəni və məişət müəssisələri, istirahət mərkəzləri yaradılması planlaşdırılır.
Ərazidə yerləşən daş karxanalarının yerində süni göllər yaradılaraq istirahət guşələri kimi istifadə ediləcək. Layihələndirilmiş ərazi 1350 hektar olmaqla, 35-40 min nəfər əhali üçün hesablanıb.
Yeni salınacaq qəsəbə şərqdən mövcud Qala-Türkan, cənubdan Hövsan-Türkan və şimaldan isə Zığ-Türkan yolunu birləşdirən avtomobil yolları ilə əhatələnir. Ərazidə yaşayış və sahibkarlıq fəaliyyəti üçün ayrılmış ərazilər, eləcə də sənaye əraziləri və hazırda istismarı dayandırılmış daş karxanaları mövcuddur.
Ərazinin şimal hissəsindən Samur-Abşeron su kanalı və neft kəməri keçir.
1news.az
